Караль Біске

Караль Біске
Дата нараджэння	1863[…]
Месца нараджэння	Варшава, Царства Польскае, Расійская імперыя
Дата смерці	1928[…]
Месца смерці	Варшава, Варшаўскае ваяводства, Польская Рэспубліка
Месца пахавання	Старыя Павонзкі
Дзеці	Рышард Біске
Род дзейнасці	мастак
Медыяфайлы на Вікісховішчы

Караль Біске (польск.: Karol Biske; 1863—1928) — польскі мастак.

Біяграфія

Першыя ўрокі малявання браў у гімназіі ў Адрыяна Глэмбоцкага, а пазней вучыўся ў варшаўскім Класе малявання ў Войцеха Герсана і Аляксандра Камінскага. У 1883—1885 гадах вучыўся ў Пецярбургскай Акадэміі мастацтваў. Пасля вяртання ў Варшаву рабіў дрэварыты для «Tygodnik Ilustrowany», выкладаў маляванне ў гімназіях. У 1897 годзе адкрыў уласную школу жывапісу ў Варшаве.

Падчас 1-й сусветнай вайны, з 1914 года быў у бежанстве ў Мінску. Напэўна, у сакавіку 1916 года быў адным са стваральнікаў у Мінску Аддзела помнікаў пры Цэнтральным грамадзянскім камітэце. У 1918 годзе Аддзел фактычна замяніла Мінскае кола Таварыства апекі над помнікамі мінуўшчыны, Караль Біске быў сярод членаў Управы Мінскага кола, а яго сын Рышард — сакратаром. Аддзел і потым Мінскае кола займалася пошукам, фіксацыяй, ратаваннем і вывазам у Польшчу культурных каштоўнасцяў, як эвакуяваных расійскімі ўладамі пры адступленні з польскіх губерняў, так і мясцовых. Караль Біске зрабіў вялікую колькасць замалёвак помнікаў у Мінску і рэгіёне. У 1918 годзе, пасля заняцця Мінска Чырвонай Арміяй, Біске вярнуўся ў Варшаву. Узнагароджаны за гэту дзейнасць.

Магіла сям’і Біске, у тым ліку Караля, на могілках Старыя Павонзкі.

Пахаваны на Старых Павонзках.

Сям’я

Меў дачку і двух сыноў, адзін з іх польскі рэжысёр Рышард Біске (1895—1938).

Творчасць

Пісаў пераважна пейзажы, у творах выяўляў чуласць да прыроды, пачуццё настрою і колеру.

Выстаўляў творы пераважна ў Таварыстве заахвочвання прыгожых мастацтваў у Варшаве, салоне Аляксандра Крывульта ў Варшаве і Таварыстве сяброў прыгожых мастацтваў у Познані (польск.: Towarzystwo Przyjaciół Sztuk Pięknych w Poznaniu).

Творы захоўваюцца, між іншым, у Нацыянальным музеі ў Варшаве.

Літаратура

• Дзярновіч Алег. План «Новага Места» Мінска 1804 г.: новая іканаграфічная крыніца са збораў Мінскага Кола Варшаўскага Таварыства Апекі над Помнікамі Мінуўшчыны // Мінск і мінчане: дзесяць стагоддзяў гісторыі (да 940-годдзя горада): матэрыялы Міжнар. навук.-практ. канф. (Мінск, 7—9 верас. 2007 г.). — Мінск: Беларуская навука, 2008. — С. 185—189.
• Ластоўскі Вацлаў. Вываз крыўскіх культурных цэннасьцяў у Польшчу ў часе польска-расійскай вайны 1918—1919 гг. // «Крывіч», № 2 (10), ліпень-сьнежань 1925 г. — C. 108—110