Мілдрэд Мак-Дэніел

Мілдрэд Мак-Дэніел
англ.: Mildred McDaniel
Пол	жанчына
Мянушка	Tex
Спецыялізацыя	скачкі ў вышыню
Нарадзілася	4 лістапада 1933(1933-11-04) ці 3 лістапада 1933(1933-11-03) Атланта, Фултан, Джорджыя, ЗША
Памерла	30 верасня 2004(2004-09-30) (70 гадоў) Пасадэна, акруга Лос-Анджэлес, Каліфорнія, ЗША
Пахаванне	Mountain View Cemetery and Mausoleum[d]
Грамадзянства	ЗША
Альма-матар	David T. Howard High School[d]
Рост	176 см
Вага	55 кг
IAAF	14430536

Мілдрэд Луіза «Мілі» Мак-Дэніел-Сінглтан (англ.: Mildred Louise «Millie» McDaniel-Singleton, у дзявоцтве — Мак-Дэніел; 4 лістапада 1933, Атланта, Джорджыя, ЗША — 30 верасня 2004, Пасадэна, Каліфорнія, ЗША) — амерыканская лёгкаатлетка, спецыялізавалася на скачках у вышыню. Алімпійская чэмпіёнка 1956 года, чэмпіёнка Панамерыканскіх гульняў 1955 года.

Біяграфія

Мілі Мак-Дэніел нарадзілася ў Атланце і скончыла мясцовую старэйшую школу Дэвіда Говарда, якая прызначалася для дзяцей афраамерыканцаў.

У 1953 Мак-Дэніел атрымала перамогу ў скачках у вышыню на чэмпіянаце ЗША па лёгкай атлетыцы. У 1955 і 1956 гадах яна паўтарыла гэтае дасягненне, прычым як на адкрытым паветры, так і ў памяшканні. У 1955 годзе спартсменка таксама прыняла ўдзел у Панамерыканскіх гульнях у Мехіка, дзе атрымала пераканаўчую перамогу, перасягнуўшы вынік сярэбранага прызёра амаль на 10 см.

У снежні 1956 года Мак-Дэніел прыняла ўдзел у спаборніцтвах у скачках у вышыню на Алімпійскіх гульнях у Мельбурне. На Гульнях амерыканка была адзінай, хто здолеў пераадолець вышыню 1,70 м, стаўшы алімпійскай чэмпіёнкай. Прапусціўшы адзнакі 1,72 м і 1,74 м, Мілі з другой спробы ўстанавіла новы сусветны рэкорд у 1,76 м, перасягнуўшы на 1 см папярэдняе дасягненне румынкі Ёланды Балаш.

Апроч лёгкай атлетыкі Мак-Дэніел займалася таксама баскетболам, выступала за каманду Таскігійскага інстытута. У 1983 годзе спартсменка была ўключана ў Залу спартыўнай славы штата Джорджыя.

Пасля завяршэння сваёй спартыўнай кар’еры Мілдрэд пераехала ў Каліфорнію, дзе выкладала фізкультуру на працягу 32 гадоў. 30 верасня 2004 года ва ўзросце 70 гадоў амерыканка памерла.