Нака́рдыі (Nocardia) — род бактэрый групы актынаміцэтаў.
Вядома дзясяткі відаў. Пашыраны ў глебе, вадаёмах і іншых прыродных субстратах. Утвараюць міцэлій з дыяметрам гіфаў 0,5—2 мкм. Нерухомыя. Грамстаноўчыя. Аэробы. Размнажаюцца фрагментацыяй міцэлію, некаторыя ўтвараюць таксама споры і хламідаспоры.
Сапрафіты, ёсць патагенныя віды для чалавека і жывёл (узбуджальнікі накардыёзу). У глебе ўтылізуюць устойлівыя да раскладання рэчывы расліннага паходжання (лігнін), удзельнічаюць у мінералізацыі гумусу, раскладаюць цяжкадаступныя для іншых мікраарганізмаў рэчывы (сінтэтычныя матэрыялы, воскі, вуглевадароды, адходы нафтавай прамысловасці). Могуць выкарыстоўвацца для барацьбы з забруджваннем навакольнага асяроддзя.
