Электрастатычнае поле

Электрастаты́чнае по́ле — фізічнае поле, створанае нерухомымі электрычнымі зарадамі; асобны выпадак электрамагнітнага поля.

Сілавая характарыстыка электрастатычнага поля — напружанасць электрычнага поля, энергетычная — электрычны патэнцыял.

Сілавыя лініі напружнасці электрастатычнага поля не замкнутыя: яны пачынаюцца на дадатных электрычных зарадах і канчаюцца на адмоўных (ці ідуць у бесканечнасць). У дыэлектрыках электрастатычнае поле характарызуецца вектарам электрычнай індукцыі, які падпарадкоўваецца тэарэме Гауса. У аднародных дыэлектрыках у выніку палярызацыі дыэлектрыка электрастатычнае поле аслабляецца ў ε разоў, дзе ε — дыэлектрычная пранікальнасць.

Унутры праваднікоў электрастатычнае поле роўнае нулю (у тым ліку ўнутры поласці пустацелага правадніка), на чым грунтуецца электрычнае экранаванне.

Электрастатычнае поле патэнцыяльнае, г.зн. што работа па перамяшчэнні электрычнага зараду паміж любымі двума пунктамі электрастатычнага поля не залежыць ад формы траекторыі і вызначаецца толькі рознасцю электрычных патэнцыялаў паміж гэтымі пунктамі.

Гл. таксама

• Электрастатыка
• Электрычнае поле

Літаратура

• Электрастатыка // Беларуская энцыклапедыя: У 18 т. Т. 18. Кн. 1: Дадатак: Шчытнікі — Яя / Рэдкал.: Г. П. Пашкоў і інш. — Мн. : БелЭн, 2004. — Т. 18. Кн. 1. — С. 90. — 10 000 экз. — ISBN 985-11-0035-8. — ISBN 985-11-0295-4 (т. 18. Кн. 1).