Cæremoniale Episcoporum

Cæremoniale Episcoporum (лац.: Цырыманіял біскупаў) — літургічная кніга, якая апісвае царкоўныя службы, што здзяйсняюцца біскупамі лацінскага абраду Рымска-каталіцкай царквы.

Гісторыя

Папа Рымскі Клімент VIII выдаў 14 ліпеня 1600 года першую кнігу, якая насіла такую назву, папраўляючы ў адпаведнасці з патрабаваннямі Трыдэнцкага сабора змест кніг, званых Ordines Romani, якія былі напісаныя з канца VII стагоддзя і апісвалі цырымоніі абрання Папы Рымскага і давалі інструкцыі Рымскім Папам для служэння імшы і іншых службаў на працягу года. Змест гэтых кніг праз некаторы час быў пашыраны. Праца ў дзвюх частках, вядомых як De Cæremoniis Cardinalium et Episcoporum in eorum diœcesibus («Цырымоніі кардыналаў і біскупаў у сваіх уласных дыяцэзіях»), была дададзеная ў XVI стагоддзі. Cæremoniale Episcoporum Папы Клімента VIII быў заснаваны на гэтых тэкстах і на іншых, якія цяпер страчаныя. Падрыхтоўчая праца, распачатая ў снежні 1582 года пры Папе Рымскім Грыгорыі XIII, заняла 17 гадоў. Факсіміле арыгінальнага выдання 1600 года ў дзвюх кнігах было выдадзенае Libreria Editrice Vaticana ў 2000 годзе.

Папа Рымскі Інакенцій X апублікаваў выпраўленае выданне ў 1650 годзе. У 1727 ці 1729 годзе разделы, першапачаткова надрукаваныя як асобныя блокі, былі падзеленыя на пранумераваныя параграфы і суміраваныя. У 1752 годзе Папа Рымскі Бенедыкт XIV крыху перагледзеў дзве існаваўшыя кнігі і дадаў трэцюю частку цырымоній, якія трэба было выконваць тым, хто займаў грамадзянскія пасады ў Папскай вобласці.

У 1886 годзе Папа Рымскі Леў XIII зрабіў іншае выпраўленне, у якім ён захаваў трэцюю кнігу, хоць Папская вобласць і была далучаная да каралеўства Італіі.

Сённяшні стан

У адпаведнасці з абнаўленнем, прадпісаным Другім Ватыканскім саборам, цалкам перагледжанае выданне ў асобным томе было апублікаванае Папам Янам Паўлам II у 1984 годзе, замяніўшы ранейшыя выданні.

Змест Cæremoniale Episcoporum

Кніга складаецца з васьмі частак:

1. Біскупская літургія;
2. Імша;
3. Літургія гадзін і служба Божага слова;
4. Царкоўная служба сакрамэнтаў на працягу года;
5. Сакрамэнты;
6. Сакрамэнталіі;
7. Значныя даты ў жыцці біскупа;
8. Літургічныя службы, звязаныя з урачыстымі дзеяннямі біскупскай улады.

Ёсць таксама дадаткі:

1. Пастаўленне пралатаў;
2. Табліца літургічных дзён;
3. Табліца на рытуальныя імшы, імшы ў розных патрэбах, ватыўныя імшы і імшы за памерлых;
4. Спіс скарачэнняў і ўмоўных пазначэнняў.

Гл. таксама

• Каталіцкія літургічныя кнігі
• Рымскі пантыфікал

Спасылкі

• Caeremoniale Episcoporum, 1886 Edition (лац.) (PDF) (2006). Праверана 1 мая 2010.
• Caeremoniale Episcoporum, 1752 Edition (фр.) (PDF) (2006). Праверана 1 мая 2010.