Клім Міхайлаў
| Клім Міхайлаў | |
|---|---|
| Дата нараджэння | XVII стагоддзе |
| Месца нараджэння | |
| Дата смерці | невядома |
| Род дзейнасці | мастак |
Клім Міхайлаў (?, Шклоў — ?) — майстар разной і сталярнай справы, адзін з найлепшых рэзчыкаў у Маскве другой паловы XVII стагоддзя.
Біяграфія
[правіць | правіць зыходнік]Пасля заняцця рускімі Шклова ў 1654 годзе, Клім трапіў (палонам ці добраахвотнай службай) да князя Р. С. Куракіна. У Маскве князь Куракін ажаніў Кліма са сваёй дваровай дзеўкай Анюткай. Потым перададзены Куракіным патрыярху Нікану і аздабляў Васкрасенскі сабор Нова-Іерусалімскага манастыра на Істры (1650-я — 1660-я). Затым Клім пераведзены на службу ў Палату разьбярскіх і сталярных спраў, адначасова з ім туды трапілі майстры сталярнай справы з Іверскага манастыра — Андрэй Фёдараў, мешчанін з Оршы, Герасім Акулаў з Дуброўны, Восіп Андрэеў з Вільні, Якаў Іваноў з Віцебска.
Кліма далі памочнікам старцу Арсенію, вопытнаму беларускаму рэзчыку, які даўно працаваў для Маскоўскага двара. Тым жа часам, Міхайлаў меў і сваіх вучняў. Хутка па пераводзе да Палаты разьбярскіх і сталярных спраў, у 1667—1668 гадах разам з іншымі майстрамі аздабляў новы царскі палац у Каломенскім. Разам са старцам Арсеніем і Сцяпанам Зіноўевым стварыў «Іарданскую сень» (1668), яе калонкі і шацёр аздобленыя пазалочанай разьбой і каляровым роспісам. Калі ў 1681 годзе Арсеній памёр, Клім заняў яго месца на чале ўсіх крамлёўскіх рэзчыкаў. Пад кіраўніцтвам Міхайлава створаны іканастасы трох цэркваў у Ізмайлаве.
Апроч кліраса і іканастаса Смаленскага сабора Новадзявочага манастыра, з работ Кліма Міхайлава з таварышамі на нашых дзён захаваўся рэдкі (цяпер адзіны) паліхромны разны іканастас, зроблены на заказ цара Фёдара Аляксеевіча, для палацавай царквы Васкрасення Славушчага ў Крамлі.
Зноскі
Літаратура
[правіць | правіць зыходнік]- Абецедарский Л. С. Белорусы в Москве в XVII в.: Из истории русско-белорусских связей. — Минск, 1957.
- Грудзіна А. Клім Міхайлаў // Памяць: Гіст.-дакум. хроніка Шклоўскага раёна. — Мінск: Універсітэцкае, 1998. — С. 43.
- Ільюшэнка М. Шклаўчане ў Маскве // Памяць: Гіст.-дакум. хроніка Шклоўскага раёна. — Мінск: Універсітэцкае, 1998. — С. 43.