Яраслаў Генадзевіч Багуноў

Яраслаў Багуноў
Поўнае імя	Яраслаў Генадзевіч Багуноў
Нарадзіўся	4 верасня 1993(1993-09-04) (31 год) Луганск, Луганская вобласць, Украіна
Грамадзянства	Украіна
Рост	169 см
Вага	66 кг
Пазіцыя	паўабаронца, нападнік
Інфармацыя пра клуб
Клуб	Інгулец
Нумар	27
Маладзёжныя клубы
2006—2008 Алімпік-ВАР (Данецк) 40 (14) 2008 Дняпро (Днепрапятроўск) 7 (5) 2009—2010 Металіст (Харкаў) 25 (8)
Клубная кар’ера
2010—2011 Металіст (Харкаў) 0 (0) 2012 Шчасце 2013—2015 Белшына (Бабруйск) 56 (9) 2017 Нафтан (Наваполацк) 9 (0) 2017 Крумкачы (Мінск) 14 (2) 2018 Палессе (Жытомір) 4 (0) 2018—2019 НФК (Мінск) 17 (6) 2019—2020 Львоў 31 (1) 2022 Дзіназ (Вышгарад) 14 (4) 2023 Львоў 14 (2) 2023— Інгулец (Пэтровэ) 9 (4)

Яраслаў Багуноў (нар. 4 верасня 1993, Луганск, Украіна) — украінскі футбаліст, паўабаронца пэтроўскага «Інгульца».

Клубная кар’ера

Выхаванец луганскага футбола, гуляў за юнацкія каманды розных клубаў Украіны. У сезоне 2010/11 гуляў за дубль харкаўскага «Металіста». У 2012 годзе выступаў у чэмпіянаце Луганскай вобласці за клуб «Шчасце» з аднайменнага горада.

У лютым 2013 года стаў іграком бабруйскай «Белшыны». Спачатку выхадзіў на замену, а пасля замацаваўся ў аснове бабруйскага клуба. У пачатку сезона 2014 быў іграком асновы (гуляў на пазіцыі левага паўабаронцы), але ў маі 2014 года атрымаў траўму, з-за якой выбыў да канца сезона.

У сезоне 2015 вярнуўся ў аснову «Белшыны», стаў выступаць пераважна на пазіцыі правага паўабаронцы. У студзені 2016 года, пасля прыходу новага кіраўніцтва ў «Белшыну», атрымаў прапанову застацца ў клубе і падпісаў новы кантракт. Але неўзабаве падчас перадсезоннай падрыхтоўкі атрымаў траўму. У сакавіку 2016 года стала вядома, што кантракт клуба з іграком быў разарваны.

У верасні 2016 года трэніраваўся з магілёўскім «Дняпром». У пачатку 2017 года далучыўся да наваполацкага «Нафтана», з якім у сакавіку падпісаў кантракт. Пры гэтым, атрымаўшы від на жыхарства, перастаў лічыцца легіянерам у чэмпіянаце Беларусі. У чэрвені 2017 года з-за цяжкага фінансавага становішча клуба пакінуў «Нафтан».

Неўзабаве пасля зыходу з «Нафтана» далучыўся да мінскіх «Крумкачоў». У ліпені 2017 года падпісаў кантракт са сталічным клубам. У першым жа матчы за «Крумкачы» адзначыўся голам у браму свайго былога клуба «Нафтана», тым самым дапамог мінчанам выйсці ў чвэрцьфінал Кубка Беларусі (выніковы лік 2:1). Пазней замацаваўся ў якасці трывалага іграка асновы. 26 лістапада 2017 года ў матчы апошняга тура супраць «Мінска» забіў гол ударам праз сябе, тым самым прынёс «Крумкачам» перамогу 2:1 і дапамог клубу захаваць месца ў Вышэйшай лізе на наступны сезон.

Па заканчэнні сезона, у снежні 2017 года, стала вядома што Багуноў, які стаў свабодным агентам, можа працягнуць кар’еру ў Венгрыі. У студзені 2018 года праходзіў прагляд у данецкім «Алімпіку», а ў лютым — у тбіліскім «Дынама». Пазней вярнуўся ў склад «Крумкачоў», аднак клуб не здолеў атрымаць ліцэнзію на ўдзел у Вышэйшай лізе на сезон 2018. Багуноў, які выказваў незадаволенасць рашэннем АБФФ аб адхіленні заяўцы клуба на ліцэнзію, быў адштрафаваны і дыскваліфікаваны на 3 матчы «за абразлівыя паводзіны».

У маі 2018 года далучыўся да жытомірскага «Палесся» з Другой лігі Украіны, па заканчэнні сезона 2017/18 пакінуў клуб. У верасні 2018 года зноў стаў іграком «Крумкачоў». Разам з клубам выйшаў у Першую лігу, дзе клуб змяніў назву на НФК, стаў адным з асноўных ігракоў каманды. У ліпені 2019 года па пагадненні бакоў пакінуў мінскі клуб. і неўзабаве падпісаў двухгадовы кантракт з клубам украінскай Прэм’ер-лігі «Львоў».

У жніўні 2020 года быў дыскваліфікаваны АБФФ на 2 гады па справе аб дагаварных матчах. У кастрычніку 2020 года рашэнне АБФФ было распаўсюджана ФІФА на ўсе спаборніцтвы пад яе эгідай.

У жніўні 2022 года па адбыцці дыскваліфікацыі далучыўся да «Дзіназа» з Вышгарада ў Першай лізе. У студзені 2023 года вярнуўся ў «Львоў», а ў жніўні 2023 года перайшоў у «Інгулец».