Рэната Гутуза

Рэната Гутуза
італ.: Renato Guttuso
Дата нараджэння	26 снежня 1911(1911-12-26)[…]
Месца нараджэння	Багерыя[d], правінцыя Палерма, Сіцылія, Каралеўства Італія
Дата смерці	18 студзеня 1987(1987-01-18)[…] (75 гадоў)
Месца смерці	Рым, правінцыя Рым, Лацыа, Італія
Грамадзянства	Італія  Каралеўства Італія  Італія
Род дзейнасці	мастак, палітык, рысавальнік, графік
Жанр	графіка
Вучоба	Універсітэт Палерма
Мастацкі кірунак	экспрэсіянізм
Партыя	Італьянская камуністычная партыя[d]
Член у	Акадэмія Святога Лукі
Узнагароды
Медыяфайлы на Вікісховішчы

Рэната Гутуза (іт. Renato Guttuso; 26 снежня 1911 ці 2 студзеня 1912, Багерыя — 18 студзеня 1987, Рым) — італьянскі жывапісец, графік, ганаровы член Акадэміі мастацтваў СССР (1962). Адзін са стваральнікаў новага фронту мастацтваў.

Біяграфія

Рэната Гутуза нарадзіўся ў прыгарадзе Палерма Багерыі ў сям’і землямера Джаакіна Гутуза Фазула. Першыя ўрокі малявання атрымаў у сельскага майстра, які займаўся роспісам вазоў. Вучыўся ў ліцэі, наведваў курсы мастака-футурыста Піпа Рыца. У 1931 годзе Гутуза ўдзельнічае ў Куадрыенале — выставе італьянскіх мастакоў у Палерма, якая праходзіць раз у чатыры гады, дзе дзве яго карціны былі адзначаны крытыкай. У 1930 годзе паступіў на факультэт права ва ўніверсітэце Палерма. Праз год кінуў вучобу і пераехаў у Рым. Працаваў рэстаўратарам у галерэі Баргезэ. У Рыме Гутуза збліжаецца з дзеячамі мастацтва, апазіцыйнымі рэжыму Мусаліні. Яго артыкул пра Пікасо (1933) у газеце «Ора» пацягнуў за сабой абвінавачанне з боку цэнзуры ў парушэнні грамадскай бяспекі. Уваходзіў (1938) у арт-аб’яднанне «Карэнтэ» («Плынь»), якое выдавала аднайменны літаратурна-мастацкі часопіс. У 1940 годзе Гутуза ўступіў у Камуністычную партыю Італіі (з 1956 — у ЦК Кампартыі).

У гады Другой сусветнай вайны Гутуза стварае адзін са знакамітых сваіх твораў — «Распяцце»: «Я хачу напісаць гэтае пакаранне Хрыста як сённяшнюю сцэну… Хрыстос як сімвал усіх, хто сёння церпіць абразы, турмы, пакаранні за свае ідэі». Карціна пераклікаецца з «Гернікай» — у цэнтры кампазіцыі фігура каня — прамая цытата шэдэўра Пікасо. Карціна «Распяцце» экспанавалася на выставе «Прэміа Бергама» (1942) і выклікала незадаволенасць Ватыкана. З 1943 года Гутуза ўдзельнік руху Супраціўлення ў складзе партызанскай брыгады Поўдня.

У 1945 годзе разам з Перыкле Фацыні, Антоніа Карпора і некалькімі іншымі мастакамі Гутуза заснаваў групу Неа-кубіста.