Абідавічы (археалагічныя помнікі)

Гарадзішча, селішча, стаянка
Абідавічы
Краіна	Беларусь
Аграгарадок	Абідавічы

Абідавічы — археалагічныя помнікі: гарадзішча, селішча, стаянка і бескурганны могільнік каля в. Абідавічы (Быхаўскі раён, Гомельская вобласць), на левым беразе р. Дняпро.

Ва ўрочышчы Чырвоная горка знойдзена скрэблападобная прылада працы эпохі мусцье.

Гарадзішча

Знаходзіцца за 3 км на паўночны захад ад вёскі і 100 м на поўнач ад урочышча Чырвоная горка. Пляцоўка падковападобная, памерам 40х30 м, прымыкае да старога рэчышча, парасла лесам. З вонкавага боку ўмацавана 3 валамі вышынёй каля 1,5 м і равамі глыбінёй 1 м, шырынёй 5—8 м. Выявіў у 1963 годзе У. М. Сівагракаў, даследаваў у 1966 годзе Л. Д. Побаль. Культурны пласт каля 0,6 м. Знойдзены фрагменты ляпнога посуду (часткова штрыхаваныя), 2 венчыкі гаршка з дамешкамі жарствы ў гліне.

Датуецца раннім этапам зарубінецкай і калочынскай культур (II ст. да н.э.—III ст. н.э.).

Селішча—1

Знаходзіцца за 200—300 м на поўнач ад гарадзішча на высокім беразе р. Дняпро. Даследавалі ў 1926 годзе С. С. Шутаў, у 1960 годзе Л. Д. Побаль і Я. І. Бібікаў. Знойдзена кераміка бронзавага веку і ляпная гладкасценная VI—IX стст.

Побач з селішчам каля 10 курганоў. За 0,5 км на поўдні ад селішча знойдзены кальцыніраваныя косці.

Стаянка, ці селішча—2

Знаходзіцца за 1 км на поўдні ад селішча—1, за ўрочышчам Чырвоная горка. Выяўлена ляпная кераміка I—X стст.

Бескурганны могільнік

Знаходзяцца за 400—500 м на поўдзень ад селішча—2. Пахавальны абрад — трупаспаленне. Датуецца I тысячагоддзем н.э.

Літаратура

• Побаль, Л. Д. Абідавічы / Л. Д. Побаль // Археалогія і нумізматыка Беларусі: Энцыклапедыя / Беларуская Энцыклапедыя; Рэдкал.: В. В. Гетаў і інш. — Мн.: «Беларуская Энцыклапедыя» імя П. Броўкі, 1993. — 702 с. — С. 21. — ISBN 5-85700-077-7.

Спасылкі

• Абідавічы (археалагічныя помнікі) на сайце «Архіварта»