Антон Лойка

Антон Лойка
Дата нараджэння	мерк. 1746
Месца нараджэння	Слуцк, Слуцкае княства, Новагародскі павет, Новагародскае ваяводства, Вялікае Княства Літоўскае, Рэч Паспалітая
Тэатр	Слуцкі камедыхаўз Нясвіжскі тэатр Радзівілаў

Антон Лойка (1746?, Слуцк — ?) — танцоўшчык і балетмайстар.

Біяграфія

Па паходжанні беларус.

З 1756 года вучыўся ў Слуцкай балетнай школе Г. Ф. Радзівіла (у А. Пуціні і Л. М. Дзюпрэ), быў салістам мясцовай трупы.

З 1760 года працаваў у прыдворным тэатры Радзівілаў у Нясвіжы (з 1779 года — педагог балетнай школы і балетмайстар).

У 1780 годзе пасланы К. С. Радзівілам у Італію (Рым, Венецыя) і Аўстрыю (Вена) закупіць ноты балетаў і азнаёміцца з балетным мастацтвам іх тэатраў. Пасля вяртання вядучы балетмайстар Нясвіжскай балетнай школы (упамінаецца ў дакументах за 1782—1787 гады).

Разам з Г. Петынеці рыхтаваў пастаноўку балетаў «Арфей у пекле» на лібрэта Ф.Каселі і «Пігмаліён» на сюжэт «Метамарфозаў» Авідыя (1784), «Рустыка» (як мяркуюць, аўтарскае паўтарэнне «Балета сельскага», пастаўленага Петынеці ў Гродзенскім тэатры Тызенгаўза ў 1778 годзе) і «Турэцкі балет».

Працаваў у Нясвіжы з дачкой-балерынай да роспуску балета ў 1790 годзе.

Літаратура

• Антон Лойка // Тэатральная Беларусь: энцыклапедыя : у 2 т. / рэдкал.: Г. П. Пашкоў [і інш.]. — Мн.: Беларуская Энцыклапедыя, 2003. — Т. 2. — 571 с. — 4 000 экз. — ISBN 985-11-0259-8.