Асклепіядаў верш
Асклепія́даў верш — вершаваны памер антычнай (метрычнай) сістэмы вершаскладання, вынайдзены старажытнагрэчаскім паэтам Асклепіядам Самаскім (III ст. да н. э.). Гэты верш з'яўляецца па сутнасці мадыфікацыяй пентаметра, у якім першая і перадапошняя дактылічныя стопы ўсечаныя на адзін кароткі склад.
Асклепіядаў верш у беларускай літаратуры
[правіць | правіць зыходнік]У беларускай паэзіі асклепіядаў верш ужыты толькі адзін раз — у перакладзеным М. Багдановічам «Помніку» старажытнарымскага паэта Гарацыя:
- Лепшы медзі сабе памятнік справіў я,
- Болей усіх пірамід царскіх падняўся ён,
- Не зруйнуе яго сівер, ні едкі дождж,
- Ні гадоў чарада, вечнага часу рух.
- Не саўсім я памру, лепшая часць мяне
- Не зазнае хаўтур; слава мая ўвесь час
- Між патомкаў расці будзе, пакуль усхадзіць
- Зможа з дзевай удвух на Капітоллі жрэц.
Літаратура
[правіць | правіць зыходнік]- Рагойша В. П. Паэтычны слоўнік. — 3-е выд., дапрац. і дапоўн.. — Мінск: Беларуская навука, 2004. — 576 с. — 2 000 экз. — ISBN 985-08-0598-6.
- Рагойша В. П. Тэорыя літаратуры ў тэрмінах. — Мінск: Беларуская энцыклапедыя, 2001. — 384 с. — 1 000 экз. — ISBN 985-11-0197-4.