Вольга Васільеўна Саэргел

Вольга Васільеўна Саэргел
Вольга Васільеўна Саэргел
Асабістая інфармацыя
Пол	жанчына
Грамадзянства	Беларусь;
Дата нараджэння	17 сакавіка 1983 (40 гадоў)
Месца нараджэння	Мінск, БССР, СССР;
Ліцэнзія FIG	[1]
Найлепшыя вынікі на чэмпіянатах свету
Найлепшыя вынікі на Алімпіядзе
Каманднае першынство	39.500 (2000)
	Летнія Алімпійскія гульні
	Дзяржаўныя і ведамасныя ўзнагароды

Вольга Васільеўна Саэргел (у дзявоцтве Пужэвіч; нар. 17 мая 1983, Мінск) — беларуская гімнастка, сярэбраны прызёр Алімпійскіх гульняў 2000 года па мастацкай гімнастыцы ў групавым мнагаборстве. Заслужаны майстар спорту Рэспублікі Беларусь (2000).

Біяграфія[правіць | правіць зыходнік]

Нарадзілася 17 мая 1983 года ў Мінску.

З 6 гадоў трэніравалася ў мінскай СДЮШАР прафсаюзаў на вуліцы Ангарскай, пачынала як адзіночніца ў трэнераў Ганны Валянцінаўны Баранавай і яе сястры Святланы Валянцінаўны Расекі, якія заўважылі ў дзяўчынцы перспектыўную гімнастку^[1].

У 1999 годзе на чэмпіянаце Еўропы па мастацкай гімнастыцы ў Будапешце ў складзе зборнай Беларусі заваявала бронзавы медаль.

На Летніх Алімпійскіх гульнях 2000 у Сіднеі атрымала сярэбраны медаль у камандных спаборніцтвах па мастацкай гімнастыцы ў складзе зборнай Беларусі. Неўзабаве пасля Алімпійскіх гульняў завяршыла спартыўную кар’еру.

На алімпійскія прызавыя грошы набыла двухпакаёвую кватэру ў Мінску і аўтамабіль. Кіраванню аўтамабілем Вольгу вучыў Фёдар Міхайлавіч Азаранка, бацька Вікторыі Азаранка^[1].

Пры ўдзеле сябровак-гімнастак Вольгу запрасілі выступаць у танцавальным шоў на нарвежскім 14-палубным круізным акіянскім лайнеры, які курсіраваў паміж Кітаем і Аўстраліяй. На караблі працавала 9 месяцаў і пазнаёмілася там з будучым мужам, марскім афіцэрам са Швецыі^[2].

Пасля працы на лайнеры Вольга вярнулася ў Мінск, а яе шведскі сябар працягваў працаваць у ЗША на лайнеры і да яе прыехаў пазней. У 2005 годзе ў пары нарадзіўся сын Арланда. У 2006 годзе пара пабралася шлюбам, муж адвёз сям’ю ў горад Хальмстад (Швецыя) да сваіх бацькоў. У Швецыі Вольга працавала трэнерам па мастацкай гімнастыцы — спачатку ў Хальмстадзе, потым у Кальмары^[2].

У 2009 годзе развялася з мужам і вярнулася ў Мінск. У беларускай сталіцы Вольга з сяброўкай адкрыла фірму па вырабе эксклюзіўных мадэляў сумак, але яна закрылася з-за фінансавага крызісу, пасля гэтага яны заняліся ўзнагароднай прадукцыяй (кубкі і медалі), але новую фірму напаткаў той жа лёс. Пазней сяброўкі планавалі адкрыць салон міастымуляцыі, але так і не рэалізавалі гэтую ідэю^[2].

Вольга Саэргел працавала адміністратарам у рэстаране, сакратаром у прыватнай фірме, але гэта было не яе прызванне. Яна прыняла прапанову працы трэнерам-метадыстам у нацыянальнай камандзе Рэспублікі Беларусь па тэнісе, потым заняла пасаду начальніка каманды — старэйшага трэнера нацыянальнай каманды^[2].

Зараз працуе дырэктарам Мінскай гарадской СДЮШАР прафсаюзаў па мастацкай гімнастыцы імя Л. Г. Гадзіевай^[3].

Хобі[правіць | правіць зыходнік]

Разам з сяброўкай захапілася бегам, планавала прабегчы Мінскі паўмарафон^[2].

Узнагароды[правіць | правіць зыходнік]

Заслужаны майстар спорту Рэспублікі Беларусь (2000)^[4].

Зноскі

[sb-1] а ^б Где вы теперь, кто вам целует пальцы?

[mk-2] а ^б ^в ^г ^д Ольга Соэргел: марафон на полупальцах

[3] Учреждение «Минская городская СДЮШОР профсоюзов по гимнастике художественной имени Л. Г. Годиевой» Архівавана 20 лютага 2020.

[4] Указ Прэзідэнта Рэспублікі Беларусь ад 13 кастрычніка 2000 года № 546 «Аб узнагароджанні групы спартсменаў, трэнераў, работнікаў фізічнай культуры і спорту дзяржаўнымі ўзнагародамі Рэспублікі Беларусь» Архівавана 5 сакавіка 2016.

[1]

[2]

[3]

[4]