Кі-Ларга

Кі-Ларга
англ. Key Largo
Заліў на Кі-Ларга
Характарыстыкі
Плошча	150 км²
Насельніцтва	10 433 чал.
Шчыльнасць насельніцтва	69,55 чал./км²
Размяшчэнне
25°05′11″ пн. ш. 80°26′50″ з. д.
Архіпелаг	Фларыда-Кіс
Акваторыя	Фларыдскі праліў
Краіна	ЗША
Кі-Ларга
Медыяфайлы на Вікісховішчы

Кі-Ла́рга (англ.: Key Largo) — востраў у Фларыдскім праліве. З'яўляецца часткай архіпелага Фларыда-Кіс. Уваходзіць у склад амерыканскага штата Фларыда. Плошча - 150 км². Насельніцтва - 10 433 чал. (2010 г.)

Геаграфія і прырода

Кі-Ларга — самы буйны і доўгі востраў Фларыда-Кіс. Ён аддзелены ад паўвострава Фларыда пралівам, які ў самым вузкім месцы дасягае ўсяго 1,45 км. У астатніх месцах праліва рыфы і пясчаныя косы ўтвараюць шэраг неглыбокіх заліваў. У нашы дні некаторыя з гэтых вузкіх кавалкаў сушы аб'яднаны мастамі і шашой і выкарыстоўваюцца для камунікацыйнага злучэння Кі-Ларга з кантынентам. Аднак у мінулым яны стваралі істотныя перашкоды для суднаходства.

Даўжыня вострава Кі-Ларга — 63,22 км. Найбольшая шырыня — 6,63 км, але ў некаторых месцах яна не перавышае 445 м. Кі-Ларга мае каралавае паходжанне. Суша нізкая, складзена з вапняку і дробнага пяску. Маецца некалькі ўнутраных лагун.

Клімат трапічны вільготны. Улетку здараюцца моцныя ўраганы.

Наземныя флора і фаўна значна пацярпелі ад прысутнасці чалавека. На некаторых участках узбярэжжа захаваліся мангравыя лясы. На Кі-Ларга спыняюцца пералётныя птушкі. Значна большую разнастайнасць мае навакольны падводны свет, дзе налічваецца 55 відаў каралаў і 500 відаў рыб. Для захавання прыроды на Кі-Ларга створаны марскі нацыянальны парк, два батанічныя паркі, цэнтр назірання за дзікімі птушкамі, два дзяржаўныя і прыватная ўстановы вывучэння і гадавання дэльфінаў.

Гісторыя

Найстаражытнейшымі вядомымі насельнікамі вострава Кі-Ларга былі прадстаўнікі індзейскага народа кулуса, якія перасяліліся сюды з суседняй Фларыды. Археолагамі знойдзены рэшткі буйных штучных пабудоў, узведзеных паміж 1000 г. і 1499 г. Мяркуецца, што яны маглі выкарыстоўвацца для навігацыі або ў рэлігійных мэтах. У пачатку XVI ст. востраў быў адкрыты іспанцамі і названы імі Cayo Largo (літаральна "доўгі рыф"). Сучасная назва з'явілася толькі ў 1870 г. Да канца XVIII ст. мясцовае карэннае насельніцтва вымерла ў выніку сутычак з піратамі або эпідэміі. У XVI - XIX стст. праз Фларыдскі праліў праходзіў ажыўлены марскі шлях, які злучаў Вест-Індыю з Еўропай. Каля Кі-Ларга выяўлены рэшткі частых караблекрушэнняў.

У XIX ст. на Кі-Ларга з'явіліся перасяленцы з ЗША, якія займаліся ловам рыбы і вырошчваннем ананасаў і лайма. Першае вядомае паселішча мела назву Плантэр. У 1870 г. на востраве жыло 60 чалавек. У 1881 г. на Кі-Ларга была адкрыта пошта. У 1908 г. востраў злучаны з кантынентам чыгункай, што дзейнічала да 1935 г. З 1940 г. развіваецца турызм.