Раман Падаляка

Раман Падаляка
Дата нараджэння	9 сакавіка 1981(1981-03-09) (43 гады)
Месца нараджэння	Мінск, БССР, СССР
Адукацыя	тэатральны факультэт Беларускай дзяржаўнай акадэміі мастацтваў (2002)
Прафесія	акцёр
Тэатр	Нацыянальны акадэмічны тэатр імя Янкі Купалы

Раман Падаля́ка (нар. 9 сакавіка 1981, Мінск) — беларускі акцёр.

Біяграфія

У 2002 годзе скончыў тэатральны факультэт Беларускай дзяржаўнай акадэміі мастацтваў па спецыяльнасці «Акцёрскае мастацтва драматычнага тэатра і кіно» (курс народнага артыста Беларусі В. М. Раеўскага). З 2002 года працаваў у Нацыянальным акадэмічным тэатры імя Янкі Купалы.

Пасля масавых фальсіфікацый на прэзідэнцкіх выбарах 2020 года, жорсткага разгону акцый пратэстаў, збіцця і катаванняў затрыманых пратэстоўцаў, калектыў Купалаўскага тэатра 13 жніўня запатрабаваў спыніць гвалт у дачыненні да мірных грамадзян і выступіў за пералік галасоў з удзелам незалежных назіральнікаў. 17 жніўня ўладамі быў звольнены дырэктар тэатра Павел Латушка. 26 жніўня Раман Падаляка разам з большасцю трупы і іншымі супрацоўнікамі тэатра звольніўся ў знак пратэсту.

Творчасць

Сярод найлепшых роляў: Андрэй («Страсці па Аўдзею» У. Бутрамеева), Эмануэль («Барух-Эмануэль» Д. Плакса), Ратнік («Князь Вітаўт» А. Дударава), Уцякін, Недзім («Саламея» С. Кавалёва), Гайдук («Ідылія» В. Дуніна-Марцінкевіча), Муж, Гаспадар купэ («Мы і ЯНО» А. Аверчанкі), Карл («Эрык XIV» А. Стрындберга), Студэнт («С. В.» паводле А. Чэхава «Вішнёвы сад»), Іван Цярэшка («Балада пра каханне» В. Быкава), Якаб Рундзіс («Вольга» Л. Руаханен), Тоні («Маці» К. Чапека).

У бягучым рэпертуары (2020) выконваў ролі: Васіль («Людзі на балоце» паводле І. Мележа), Граф («Пан Тадэвуш» А. Міцкевіча), Барыс Аляксеевіч Трыгорын («Чайка» А. Чэхава), Ігнат («Дзве душы» М. Гарэцкага), Лука Лукіч Хлопаў («Рэвізор» М. Гогаля), Пан Альберт («Шляхціц Завальня, або Беларусь у фантастычных апавяданнях» паводле Я. Баршчэўскага).

Спасылкі

• Раман Падаляка на сайце Нацыянальнага акадэмічнага тэатра імя Янкі Купалы.