Таварыства вывучэння Магілёўскай губерні

Тавары́ства вывучэ́ння Магілёўскай губе́рні — гісторыка-краязнаўчае таварыства, што існавала ў Магілёве ў 1902—1916 гадах.

Заснавана па ініцыятыве Е. Р. Раманава пад назвай «Таварыства вывучэння Беларускага краю». Мела статут (зацверджаны ў сакавіку 1905 года). У сувязі з утварэннем гістарычна-краязнаўчых таварыстваў у Віцебску, Мінску і іншых гарадах у сакавіку 1913 года рэарганізавана. Члены: Е. Р. Раманаў, І. А. Сербаў, А. П. Сапуноў, М. М. Турбін. Вывучала гісторыю, этнаграфію і прыроду Беларусі, пераважна Магілёўскай губерні. Выдала працу Раманава «Першакрыніцы для гісторыі Магілёўскага краю» (вып. 1, 1916), у якую ўвайшлі «Баркалабаўскі летапіс» і «Падарожныя заметкі стольніка П. А. Талстога аб Магілёўскай губерні (1697—1699)». Падрыхтавала да выдання 4-ы выпуск зборніка «Магілёўская даўніна» і інш.

У Першую сусветную вайну эвакуіравана ў Адэсу, дзе спыніла дзейнасць.

Літаратура

• Бандарчык В. К. Гісторыя беларускай этнаграфіі: пачатак ХХ ст. / В. К. Бандарчык. — Мн.: Навука і тэхніка, 1970. — 123 с.: іл.
• Тавары́ства вывучэ́ння Магілёўскай губе́рні // Энцыклапедыя гісторыі Беларусі. У 6 т. Т. 6. Кн. 1: Пузыны — Усая / Рэдкал.: Г. П. Пашкоў (галоўны рэд.) і інш.; Маст. Э. Э. Жакевіч. — Мн. : БелЭн, 2001. — С. 491. — 10 000 экз. — ISBN 985-11-0214-8.
• Тавары́ства вывучэ́ння Магілёўскай губе́рні // Беларуская энцыклапедыя: У 18 т. Т. 15: Следавікі — Трыо / Рэдкал.: Г. П. Пашкоў і інш. — Мн. : БелЭн, 2002. — Т. 15. — С. 372—373. — 10 000 экз. — ISBN 985-11-0035-8. — ISBN 985-11-0251-2 (т. 15).
• Саітава В. І. Гісторыя краязнаўства Беларусі: вучэб. дапам. / В. І. Саітава. — Мн.: Бел. дзярж. ун-т культуры і мастацтваў, 2009. — С. 84,97. — 203 с. — ISBN 978-985-6798-59-0.