Фёдар Ігнатавіч Пастарнацкі

Фёдар Ігнатавіч Пастарнацкі
Дата нараджэння	13 (25) снежня 1845 ці 1845
Месца нараджэння	Дукора, Ігуменскі павет, Мінская губерня, Расійская імперыя
Дата смерці	7 (20) жніўня 1902 ці 1902
Месца смерці	Пяцеўшчына, Мінскі павет, Мінская губерня, Расійская імперыя
Грамадзянства	Расійская імперыя
Род дзейнасці	урач
Месца працы	Ваенна-медыцынская акадэмія імя С. М. Кірава[d]
Альма-матар	Мінская духоўная семінарыя медыцынскі факультэт Кіеўскага ўніверсітэта[d] (1971)
Вядомы як	адзін з заснавальнікаў бальнеалогіі і курарталогіі ў Расіі
Медыяфайлы на Вікісховішчы

Фёдар Ігнатавіч Пастарнацкі (25 (13) снежня 1845, в. Дукора Ігуменскі павет Мінскай губерні — 20 (7) жніўня 1902, в. Пяцеўшчына) — беларускі навуковец у галіне ўнутранай медыцыны, адзін з заснавальнікаў бальнеалогіі і курарталогіі ў Расіі.

Біяграфія

Нарадзіўся ў сям’і святара. Скончыў Мінскую духоўную семінарыю, паступіў на медыцынскі факультэт Кіеўскага ўніверсітэта, які скончыў ў 1871 годзе атрымаўшы дыплом лекара з адзнакай.

З 1872 года малодшы доктар пяхотнага палка, пазаштатны ардынатар тэрапеўтычнай клінікі медыцынскага факультэта, выкладчык ваенна-фельчарскай школы, старэйшы доктар шпіталя. З 1879 года ардынатар Брэст-Літоўскага ваеннага шпіталя, адкуль Ф. Пастарнацкі накіраваны ў клініку кафедры агульнай дыягностыкі і тэрапіі Пецярбургскай ваенна-медыцынскай акадэміі прафесара Ю. Т. Чудноўскага.

Вёў вялікую педагагічную і навуковую работу. У 1888 годзе абараніў доктарскую дысертацыю пра дзеянне гарачкапаніжальных сродкаў на тэмпературу цела пры ліхаманцы. З 1888 года прыватдацэнт, з 1893 — прафесар шпітальнай тэрапеўтычнай клінікі Ваенна-медыцынскай акадэміі і яе загадчык.

Навуковая дзейнасць

Ф. Пастарнацкі шмат зрабіў для вывучэння захворванняў унутраных органаў. Вядома манаграфія — «Піэліт». Тэрапеўт прапанаваў арыгінальны метад пальпацыі нырак. Сімптом Пастарнацкага шырока выкарыстоўваецца ў практыцы. Выкарыстоўваў медыцынскую апаратуру: кардыёграф, уратаскоп.

Адзін з важных бакоў дзейнасці прафесара Пастарнацкага — прымяненне фізіятэрапеўтычных і курортных метадаў лячэння. У прыватнасці, ён вывучаў уздзеянне каўказскіх мінеральных водаў на арганізм хворага. Пастарнацкі актыўна ўдзельнічаў у арганізацыі Усерасійскай гігіенічнай выстаўкі (1894). Праз некалькі гадоў па выстаўцы з яго настойлівай прапановы адбыўся 1-ы з’езд па кліматалогіі, бальнеалогіі і гідрабіялогіі.

Памяць

У двары Крупіцкай урачэбнай амбулаторыі ўсталяваны памятны знак у гонар прафесара Ф. І. Пастарнацкага. Адна з вуліц Крупіцы носіць яго імя.

Літаратура

• Бялоў С. Мінская праўда. 1997. 9 студз.
• Беларуская энцыклапедыя: У 18 т. Т. 17: Хвінявічы — Шчытні / Рэдкал.: Г. П. Пашкоў і інш. — Мн. : БелЭн, 2003. — Т. 17. — 512 с. — 10 000 экз. — ISBN 985-11-0035-8. — ISBN 985-11-0279-2 (т. 17). — С. 169.