Хівел ап Іеяў

Хівел ап Іеяў
вал.: Hywel ap Ieuaf
Кароль Гвінеда 974 — 985
Сумесна з	Іяга ап Ідвал (974 — 979)
Папярэднік	Іяга ап Ідвал
Пераемнік	Кадвалан ап Іеяў
Нараджэнне	X стагоддзе
Смерць	985
Бацька	Іеяў ап Ідвал
Дзеці	Кінан ап Хівел
Дзейнасць	манарх

Хі́вел ап Іеяў (вал.: Hywel ap Ieuaf, памёр у 985) — кароль Гвінеда (974—985), сын Іеява ап Ідвала.

Біяграфія

Нягледзячы на варожасць Іеява і Іяга, Хівел спачатку быў саюзнікам дзядзькі і нават суправаджаў яго падчас сустрэчы васьмі кельцкіх каралёў з Эдгарам Міралюбным у Чэстэры ў 973 годзе. Аднак у наступным годзе Хівел пайшоў на Іяга вайной і, перамогшы, вымусіў дзядзьку падзяліць уладу. У 978 годзе Хівел пачаў чарговую спробу цалкам прыбраць каралеўства да сваіх рук. Пры дапамозе англійскіх наймітаў ён захапіў манастыр Клінаг Ваўр. Яшчэ праз год Хівел спачатку перамог дзядзьку ў бітве, а затым прыцягнуў наймітаў-вікінгаў, каб тыя ўзялі Іяга ў палон. Так Хівел стаў аднаасобна кіраваць Гвінедам.

У 980 годзе Кістэнін ап Іяга кінуў выклік Хівелу. Разам з Годфрэдам Харальдсанам, кіраўніком вострава Мэн, ён напаў на Ініс Мон, але быў разбіты. Сам Кістэнін паў у баі, а вікінгі былі выгнаны з вострава. Замацаваўшы сваю ўладу, Хівел уступіў у саюз з Эльфхерам Мерсійскім і напаў на паўднёвыя каралеўствы, Брыхейніяг і Маргануг, але поспехі яго былі нязначныя. У 985 годзе англійскія саюзнікі, усхваляваныя павелічэннем магутнасці Хівела, накіравалі зброю супраць яго і забілі яго.

Літаратура

• John Edward Lloyd. A history of Wales: from the earliest times to the Edwardian conquest. — Longmans, Green & Co, 1911.

Спасылкі

• WALES, KINGS & PRINCES (англ.). Foundation for Medieval Genealogy. Архівавана з першакрыніцы 23 красавіка 2012. Праверана 14 лістапада 2011.