Янка Окліч

Янка Окліч
Асабістыя звесткі
Дата нараджэння	20 сакавіка 1889(1889-03-20)
Месца нараджэння	Вільня, Віленскі павет, Віленская губерня, Расійская імперыя
Дата смерці	14 кастрычніка 1971(1971-10-14) (82 гады)
Месца смерці	Варшава, Варшаўскае ваяводства, Польская Народная Рэспубліка
Грамадзянства	Расійская імперыя  Польская Рэспубліка  Польская Народная Рэспубліка
Альма-матар	Юрыдычны факультэт Дэрпцкага ўніверсітэта
Месца працы	Наша Ніва Kurjer Krajowy[d] Наша хата Dziennik Petersburski[d] Życie Gospodarcze[d]
Прафесійная дзейнасць
Род дзейнасці	публіцыст, перакладчык
Мова твораў	беларуская і польская
Грамадская дзейнасць
Партыя	Дэмакратычная партыя[d]
Член у	Konwent Polonia[d] Таварыства польскіх журналістаў[d]
Узнагароды	За заслугі перад Варшаўскім ваяводствам[d]
Творы ў Вікікрыніцах

Янка Окліч (сапраўднае імя Язэп Манькоўскі, польск.: Józef Mańkowski; 20 сакавіка 1889, Вільня — 14 кастрычніка 1971, Варшава) — беларускі і польскі публіцыст, журналіст, перакладчык. Падпісваўся крыптанімамі Я. О., Я. М-скі, Я. М., і-м-і, Кірмашовы П-ч.

Біяграфія

Паходзіў з сям’і працоўнай інтэлігенцыі. Сын Віктара.

Пасля заканчэння сярэдняй школы ў Вільні, атрымаў вышэйшую адукацыю на юрыдычным факультэце Дэрпцкага ўніверсітэта. Член акадэмічнай карпарацыі «Konwent Polonia».

У 1908 годзе адзін з заснавальнікаў беларускага кнігавыдавецкага таварыства «Наша хата». У 1909 г. пачаў журналісцкую дзейнасць як карэспандэнт часопіса «Dziennik Petersburski». З 1909 года таксама супрацоўнік газеты «Наша ніва».

У 1910—1913 гадах быў рэдактарам палітычнай часткі ў віленскім часопісе радыкальна-дэмакратычнага кірунку «Kurjer Krajowy» («Краёвы веснік»).

У 1915—1917 гадах жаўнер 1-й брыгады польскіх легіёнаў.

У 1914—1918 гадах супрацоўнічаў з часопісамі «Świat», «Kurier Polski», «Glos Lubelski». У 1917 годзе выконваў функцыі прэс-рэферэнта Краёвай гаспадарчай рады ў Любліне, а у 1918—1921 гадах займаў пасаду кіраўніка аддзела друку пры Міністэрстве ўнутраных спраў. У 1922—1930 гадах быў кіраўніком кінатэатраў «Jar» і «Colosseum» у Варшаве.

У 1931—1939 гадах працаваў у Экспартным таварыстве Pol-Trade. Да пачатку Другой сусветнай вайны ён быў адначасова карэспандэнтам амерыканскай польскай прэсы і публікаваў артыкулы на эканамічныя тэмы ў розных айчынных выданнях. Падчас акупацыі працаваў рабочым на сховішчы паліва і займаўся распаўсюджваннем радыёпаведамленняў, за што быў арыштаваны гестапа і сядзеў у турмах у Макотаве, а таксама на Павяку.

Пасля вызвалення ў 1945—1948 гадах стаў галоўным рэдактарам «Życie Gospodarcze» ў Катавіцах. Пасля ў 1949—1958 гадах працаваў на пасадзе кіраўніка рэдакцыі Выдавецтваў Камунікацыйных і Міністэрства сувязі. Нарэшце, у 1957—1958 гадах працаваў рэдактарам часопіса «Motoryzacja».

Грамадскі дзеяч, сябра Дэмакратычнай партыі, сябра Таварыства польскіх журналістаў і Каманды старэйшых журналістаў пры Варшаўскім аддзеле Дэмакратычнай партыі.

Узнагароды

Узнагароджаны Кавалерскім крыжам Ордэна Адраджэння Польшчы, Залатым Крыжам Заслугі і Крыжам Незалежнасці, медалём 10-годдзя Народнай Польшчы і знакам «За заслугі перад Варшаўскім ваяводствам».

Творчасць

У публіцыстычных артыкулах узнімаў пытанні грамадскага і культурнага жыцця Беларусі, пісаў пра грамадска-палітычнае самаўсведамленне народа, заклікаў да актыўнага ўдзелу яго ў грамадскім жыцці («Кааперацыя», «Карысная работа», «Куды ісці», «Ці маем права быць беларусамі?»). Аўтар рэцэнзіі на зборнік «Апавяданні» Я. Коласа («Наша ніва», 9.8.1912).

На беларускую мову перакладаў творы ўкраінскіх і польскіх пісьменнікаў.

Літаратура

• А. С. Ліс. Окліч Янка // Энцыклапедыя літаратуры і мастацтва Беларусі: У 5-і т. / Рэдкал.: І. П. Шамякін (гал. рэд.) і інш.. — Мн.: БелСЭ, 1986. — Т. 4. Накцюрн — Скальскі. — 742 с. — 9 500 экз.