Баранавіцкая газета

«Баранавіцкая газета»
Тып	газета
Краіна	Рэйхскамісарыят Остланд
Заснавана	22 ліпеня 1941
Спыненне публікацый	24 чэрвеня 1944
Мова	беларуская
Галоўны офіс	Баранавічы

«Баранавіцкая газета», таксама «Baranavickaja hazeta» (1942), «Пагоня» (вясна-лета 1944) — беларуская газета, якая выдавалася пад нямецкай акупацыяй. Выходзіла з 22 ліпеня 1941 да 24 чэрвеня 1944 ў горадзе Баранавічы на беларускай мове лацініцай, з чэрвеня 1943 г. — кірыліцай. Падтрымлівала палітыку германскіх акупацыйных улад.

Выходзіла 2 разы на тыдзень. У 1941 г. выдавалася пад назвай «Baranowitscher Zeitung» («Баранавіцкая газета») і публікавала матэрыялы на нямецкай, польскай і беларускай мовах. З 8 студзеня 1944 г. называлася «Пагоня». Друкавала інфармацыю і каментарыі падзей на франтах, распараджэнні акупацыйныйх улад, антысавецкую публіцыстыку, нарысы па гісторыі Беларусі, прозу і паэзію беларускіх аўтараў, інфармацыю аб дзейнасці мясцовых аддзяленняў Беларускай народнай самапомачы і іншае. Выйшла 313 нумароў.

Змяшчала артыкулы пра нацыянальна-культурныя адносіны і педагагічныя мерапрыемствы ва ўмовах акупацыі, правінцыяльнае жыццё ў гарадах Баранавічы, Слонім, Стоўбцы і іх наваколлі. На старонках «Баранавіцкай газэты» былі надрукаваны ўрыўкі «З гісторыі Крыўі — Беларусі» Я. Станкевіча, нарысы пра Ф. Скарыну, М. Сматрыцкага, А. Гурыновіча, празаічныя і вершаваныя творы М. Лагады, Я. Пушчы, А. Жвіра і іншых, антысавецкая публіцыстыка. Большасць матэрыялаў газеты не была падпісана.

Рэдактары: К. Берэнд, А. Бурскі, Л. Гарошка, Б. Шышко.

Літаратура

• Баранавіцкая газета // Энцыклапедыя гісторыі Беларусі. У 6 т. Т.2. — Мн. : БелЭн, 1993.
• Библиография оккупационных периодических изданий, выходивших на территории Белоруссии в 1941—1944 гг. / Автор-составитель С. В. Жумарь; Белорусский научно-исследовательский центр документоведения, археографии и архивного дела. Мн.: БелНИЦДААД, 1995. — 48 с.

Спасылкі

• «БАРАНАВІЦКАЯ ГАЗЭТА» на сайце анлайн-энцыклапедыі «Беларуская энцыклапедыя»