Даўжыня цела да 4 см, самцы меншыя за самак. Спінка аліўкавая. Удоўж цела над бакавой лініяй святлівая блакітная палоса (нагадвае свячэнне неонавых трубак, адсюль назва). Ніжняя частка цела ад сярэдзіны да хваста чырвоная. Брушка белае. Плаўнікі празрыстыя.
Водзіцца ў рацэ Укаялі (прыток Амазонкі). У Еўропу завезена ў 1930-я гады. Разводзіцца як адна з самых прыгожых і папулярных акварыумных рыб. Гадуюць у акварыумах трапічнага лесу.
