Вольга Базнаньская

Вольга Базнаньская
польск.: Olga Boznańska
Род дзейнасці	мастачка
Дата нараджэння	15 красавіка 1865(1865-04-15)[…]
Месца нараджэння	Кракаў, Аўстрыйская імперыя
Дата смерці	26 кастрычніка 1940(1940-10-26)[…] (75 гадоў)
Месца смерці	Парыж, Парыж, рэгіён Іль-дэ-Франс, Метраполія Францыі, Францыя
Месца пахавання	могілкі ў Манмарансі[d]
Грамадзянства	Аўстра-Венгрыя  Польская Рэспубліка  Францыя
Узнагароды і прэміі
Медыяфайлы на Вікісховішчы

Вольга Базнаньская (польск. Olga Boznańska; 15 красавіка 1865, Кракаў — 26 кастрычніка 1940, Парыж) — польская мастачка.

Жыццё і творчасць

Нарадзілася ў сям’і чыгуначнага інжынера; яе бацька быў па нацыянальнасці паляк, а маці — францужанка. Вучылася малюнку з дзяцінства, брала ўрокі ў мастакоў Антона Піятроўскага і Казіміра Пахвальскага. З 1886 па 1890 год жыла ў Мюнхене. Жанчын у мюнхенскую Акадэмію прыгожых мастацтваў не прымалі і Базнаньская брала прыватныя ўрокі ў Карла Крыхендорфа і Вільгельма Дзюра.

В. Базнаньская малявала пераважна партрэты, нацюрморты, пейзажы і жанравыя сцэны. У 1890-х гадах, скончыўшы навучанне, маладая мастачка пачала выстаўляць свае працы — у Мюнхене, Варшаве, Берліне, Вене. За карціну «Партрэт мастака Паўла Навумена» Базнаньская на выставе ў Вене атрымала залаты медаль; яе «Партрэт міс Мэры Брэм» заваявала ўзнагароду ў Лондане. У 1896 годзе яна атрымала прэмію парыжскага Таварыства прыгожых мастацтваў.

У 1898 годзе Базнаньская ўступіла ў Таварыства польскіх мастакоў «Мастацтва». У тым жа годзе прыехала ў Парыж. У 1900 годзе яна на выставе ў лонданскай Новай Галерэі ўдастоілася залатога медаля і ёй быў прысуджаны прыз на парыжскай Сусветнай выставе. У тым жа годзе В. Базнаньская разышлася з мастаком Юзафам Чайкоўскім, з якім доўгія гады была ў блізкіх адносінах.

У 1901 годзе адбылася выстава прац В. Базнаньскай у Пітсбургу. У 1907 годзе ёй прысуджаецца сярэбраны медаль пітсбургскім інстытутам Карнегі. У 1912 годзе В. Базнаньская, сумесна з Клодам Манэ і Агюстам Рэнуарам, прадстаўляе Францыю на выставе ў Пітсбургу. У 1932 годзе мастачка апошні раз наведвае Кракаў. У 1937 годзе на Сусветнай выставе ў Парыжы ёй прысуджаецца Гран-Пры. Удзельніца венецыянскага біенале 1938 года.

Пахавана на могілках у Манмарансі.

Выбраныя творы

• 
  «Жанчына з японскім парасонікам»
  (1886)
• 
  «Партрэт жанчыны (Цыганка)»
  (1888)
• 
  «Брэтонка»
  (1889)
• 
  «Імяніны бабулі»
  (1889)
• 
  «Партрэт мастака Паўла Наўмена»
  (1893)
• 
  «Дзяўчынка з хрызантэмамі»
  (1894)
• 
  «Партрэт пані Дыгат»
  (1903)
• 
  «Партрэт маладой жанчыны ў белым»
  (1912)
• 
  «Нацюрморт з вазай»
  (1918)
• 
  «Кветкі»
  (1921)