Віктар Андрэевіч Бекіш

Віктар Андрэевіч Бекіш
Дата нараджэння	12 лістапада 1929(1929-11-12)
Месца нараджэння	Кліманты, Гміна Радашковічы[d], Вілейскі павет, Віленскае ваяводства, Польская Рэспубліка
Дата смерці	1 лістапада 2013(2013-11-01) (83 гады)
Месца смерці	Мінск, Беларусь
Месца пахавання	Кліманты
Род дзейнасці	мовазнавец, грамадскі дзеяч, педагогіка
Месца працы	Міністэрства народнай адукацыі БССР філалагічны факультэт БДПУ імя М. Танка Уроцлаўскі ўніверсітэт
Навуковая ступень	кандыдат філалагічных навук
Навуковае званне	дацэнт
Альма-матар	філалагічны факультэт БДПУ імя М. Танка Разанскае вышэйшае паветрана-дэсантнае каманднае вучылішча (1952)
Член у	Таварыства беларускай мовы імя Францішка Скарыны
Узнагароды	Выдатнік асветы БССР[d] (1979)

Віктар Андрэевіч Бекіш (12 лістапада 1929, в. Кліманты, цяпер Маладзечанскі раён, Мінская вобласць — 1 лістапада 2013) — беларускі мовазнавец, грамадскі дзеяч, педагог, аўтар падручнікаў па беларускай мове для пачатковай школы. Кандыдат філалагічных навук, дацэнт.

Біяграфія

Віктар Бекіш нарадзіўся 12 лістапада 1929 г. у вёсцы Кліманты Віленскага ваяводства (Заходняя Беларусь, Польшча; цяпер Маладзечанскі раён Беларусі) непадалёк ад Радашковічаў у вялікай сялянскай сям’і.

Да Другой сусветнай вайны закончыў 4 класы Кліманта-Загорскай школы, з 1945 па 1950 вучыўся ў Радашковіцкай сярэдняй школе. У час вучнёўства вялікі ўплыў на яго аказаў настаўнік Фёдар Янкоўскі, будучы вядомы лінгвіст.

У 1950 годзе паступіў на беларускае аддзяленне філалагічнага факультэта Мінскага педагагічнага інстытута імя М. Горкага. Але праз кароткі час яго прызывалі ў савецкую армію. У 1950—1952 гадах курсант Разанскага пяхотнага вучылішча. Пасля малады афіцэр да 1956 года служыў у Забайкаллі. Вярнуўся на радзіму, узнавіўся на гістарычна-філалагічны факультэт (беларускае аддзяленне) педагагічнага інстытута, які скончыў у 1961 годзе.

Тры гады працаваў у Міністэрстве асветы БССР памочнікам міністра, інспектарам аддзела кадраў. У 1964 годзе паступіў у аспірантуру пры кафедры беларускай мовы Мінскага педагагічнага інстытута імя М. Горкага (кіраўнік — прафесар Марыя Жыдовіч) і ў 1967 годзе скончыў яе. Адначасова працаваў асістэнтам кафедры беларускай мовы, выкладаў студэнтам мовазнаўчыя дысцыпліны.

У 1970 годзе абараніў кандыдацкую дысертацыю па гістарычнай лексікалогіі. Выкладаў, у 1972 годзе стаў старшым выкладчыкам, у 1973 годзе — дацэнтам. З 1980 па 1991 год дацэнт кафедры беларускай мовы і методыкі яе выкладання, пэўны час быў загадчыкам гэтай кафедры.

З 1992 па 1997 год выкладаў беларускую мову ў Слёнскім універсітэце ў Польшчы.

Вёў актыўную грамадскую работу, быў сябрам Беларускага Народнага Фронту, з 1997 па 2000 г. узначальваў Фрунзенскую раённую арганізацыю ТБМ, прыклаў шмат намаганняў, каб актывізаваць яе дзейнасць, зарэгістраваў яе ў органах выканаўчай улады. Пры ім арганізацыя вырасла колькасна, налічвала 680 чалавек.

У 2003 годзе выйшаў на пенсію.

Памёр 1 лістапада 2013 годзе пасля цяжкай хваробы. Пахаваны побач з бацькамі на могілках вёскі Кліманты Маладзечанскага раёна. Пры пахаванні каля ля труны быў нацыянальны бела-чырвона-белы сцяг, таксама значок з выявай сцяга быў на лацкане пінжака нябожчыка.

Сям’я

Меў жонку Галіну Міхайлаўну, дочак Наталлю і Таццяну.

Навуковая дзейнасць

Аўтар навуковых публікацый па гісторыі беларускай мовы. Вядомы і як метадыст. Па яго падручніках беларускай мовы для 2 і 3 класаў (у суаўтарстве), якія выйшлі ў 1988, 1989 гадах вялося выкладанне ў школах, яны неаднойчы перавыдаваліся.

У перыяд працы ў Польшчы выйшаў Беларуска-польска-рускі слоўнік лінгвістычных тэрмінаў і спецыяльнай лексікі (Катавіцы, 1997).

Узнагароды

Выдатнік асветы БССР (1979), выдатнік асветы СССР (1990), узнагароджаны медалём «Ветэран працы», шматлікімі граматамі, у тым ліку граматамі Міністэрства асветы Беларусі.

Спасылкі

• Віктар Андрэевіч Бекіш на сайце анлайн-энцыклапедыі «Беларусь у асобах і падзеях»