Юрый Кепель

Юрый Кепель
Агульная інфармацыя
Пол	мужчынскі пол
Спецыялізацыя	акадэмічнае веславанне
Нарадзіўся	1910 Бутрыманцы[d], Троцкі павет, Віленская губерня, Расійская імперыя
Памёр	1940 СССР
Грамадзянства	Польская Рэспубліка
Альма-матар	Універсітэт Стэфана Баторыя Віленская беларуская гімназія

Юрый Кепель або Юры Кэпэль (польск.: Jerzy Kepel; 1910, Бутрыманцы, Віленская губерня — 1944) — заходнебеларускі журналіст, польскі спартсмен-вясляр.

Біяграфія

Нарадзіўся ў 1910 годзе ў сям’і заходнебеларускага грамадскага дзеяча Мітрафана Кепеля і яго жонкі Веры. Праваслаўны беларус.

Скончыў Віленскую беларускую гімназію ў 1929 годзе. Вучыўся на юрыдычным факультэце Універсітэта Сцяпана Баторыя, але не скончыў. Апошнім часам далучыўся да сяброў секты метадыстаў, супрацоўнічаў са студэнтамі, які трымаліся ідэй Беларускай Хрысціянскай Дэмакратыі, з групай беларускіх сенатараў, а таксама з групай левых беларускіх студэнтаў.

Рэдактар-выдавец літаратурна-мастацкага часопіса «Крыгалом», які выдаваўся ў лютым 1933 года ў Вільні. Адразу пасля выхаду першага нумару выданне было забаронена польскімі ўладамі. Сябра рэдакцыйнай калегіі «Нашай волі».

Адзін з самых вядомых акадэмічных весляроў Польшчы 1930-х гадоў, пераможац шматлікіх міжнародных спаборніцтваў. Мусіў выступаць на Алімпіядзе 1940 года ў Хельсінкі.

Пасля далучэння Заходняй Беларусі да БССР арыштаваны савецкімі органамі бяспекі, абвінавачаны ў шпіянажы і асуджаны да 10 гадоў лагераў. Адбываў тэрмін на нікелевых рудніках каля Нарыльска.

Паводле Леаніда Маракова, у чэрвені 1940 года Юрый Кепель мабілізаваны ў Чырвоную Армію, служыў у званні лейтэнанта ў 149-м гвардзейскім стралковым палку 49-й гвардзейскай стралковай дывізіі, загінуў у 1944 годзе.

Леанід Галяк, чыім настаўнікам веславання ў Студэнцкім спартыўным саюзе быў Кепель, успамінаў:

Вельмі высокі, прыгожы бляндын. Дасканалы вясьляр на адзінках. Часта займаў першае месца на рэгатах у Вільні, а аднойчы здабыў першае месца на спаборніцтвах на Сэне ў Парыжы. Пасля акупацыі Вільні Саветамі ў 1939 годзе быў арганізатарам службы парадку міліцыі, пакуль Вільня ня была падорана Жамойцам. Ня выехаў зь Вільні. Калі ў 1940 годзе Саветы акупавалі ўсю ковенскую Літву, дык Кэпэль быў арганізатарам спартыўнага жыцьця. Пасля пачатку нямецка-савецкае вайны недзе зьнік і хадзілі чуткі, што ён недзе партызаніў. Быў жанаты з Вандаю Бургардт, асыстэнткай на агрыкультурным ф-це УСБ. На ўсе запытаньні ў лістох у Вільню пра яго, ніхто не адказаў, хоць напісалі, што яго бацька Мітрафан Кэпэль памёр.

Сям’я

Меў сына Ежы, польскага эканаміста і банкіра.

Літаратура

• Кепель Юрый // Рэпрэсаваныя літаратары, навукоўцы, работнікі асветы, грамадскія і культурныя дзеячы Беларусі. Энцыклапедычны даведнік у 10 тамах (15 кнігах). Т. 1. Абрамовіч—Кушаль. / Укладальнік Л. У. Маракоў. — Смаленск, 2003. — 480 с. — ISBN 985-6374-04-9.
• Аляксандр Адамковіч. Беларусы ў Літве: учора і сёння / Рэдактар Лілея Плыгаўка. — Вільня: Таварыства беларускай культуры ў Літве, 2010. — 200 с. — ISBN 978-9955-578-14-7, 978-609-95668-0-1, 978-9955-578-16-1.