Ігар Аляксандравіч Пушкін

З Вікіпедыі, свабоднай энцыклапедыі
У Вікіпедыі ёсць артыкулы пра іншых асоб з прозвішчам Пушкін.
Ігар Пушкін
Ігар Аляксандравіч Пушкін
Дата нараджэння 22 мая 1964(1964-05-22) (59 гадоў)
Месца нараджэння Орша, Віцебская вобласць
Грамадзянства Беларусь
Род дзейнасці гісторык
Навуковая сфера гісторыя, краязнаўства
Месца працы Магілёўскі дзяржаўны ўніверсітэт харчавання
Навуковая ступень кандыдат гістарычных навук
Навуковае званне
Альма-матар Магілёўскі дзяржаўны ўніверсітэт імя Аркадзя Куляшова
Член у

Ігар Пушкін (22 мая 1964, Орша) — гісторык і краязнаўца Магілёва. Кандыдат гістарычных навук, дацэнт кафедры гуманітарных дысцыплін Магілёўскага дзяржаўнага ўніверсітэта харчавання. Вядучы гістарычнай перадачы на магілёўскім «2 канале». Адзін з ініцыятараў, стваральнікаў і першы дырэктар Музея гісторыі горада Магілёва (1992—2001).

Біяграфія

Скончыў Аршанскае педагагічнае вучылішча (1983), гістарычны факультэт Магілёўскага дзяржаўнага педагагічнага інстытута (завочна, 1989), завочную аспірантуру Інстытуту гісторыі НАНБ (1999). У Інстытуце гісторыі ў 2002 г. абараніў кандыдацкую дысертацыю «Нацыянальныя меншасці БССР у грамадска-палітычным і культурным жыцці. 1920-я гг.»[1]. Дацэнт (2005).

Займаецца даследаваннем гісторыі і культуры Беларусі, горада Магілёва, нацыянальных меншасцей Беларусі ў ХХ ст., антысавецкага ўзброенага супраціву.

Ініцыятар і арганізатар правядзення Міжнародных навуковых канферэнцый пад агульнай назвай «Гісторыя Магілёва: мінулае і сучаснасць» (1998, 2001, 2003, 2005, 2007, 2011), навуковы кіраўнік III, IV, V, VII, Х (2017 г.) канферэнцый. Адзін з арганізатараў Міжнароднай навуковай канферэнцыі «Праблемы і перспектывы станаўлення грамадзянскай супольнасці» (20-21 мая 2010, МДУХ), Міжнароднай навукова-практычнай канферэнцыі «Роля этнічнай, моўнай і культурнай разнастайнасці ў сучасным грамадстве» (29-30 мая 2014, МДУХ), Міжнароднай навукова-практычнай канферэнцыі «Ад Магдэбургскага права да сучаснага самакіравання» (28 студзеня 2017, Магілёў), Міжнароднай навукова-практычнай канферэнцыі «Кадравая і антыкарупцыйная палітыка як фактары развіцця грамадзянскай супольнасці» (24-25 мая 2018, МДУХ).

Адзін з ініцыятараў аднаўлення выдання і член рэдакцыйнай рады часопісу «Магілёўская даўніна» (1993—2001). У 1998—2001 гг. вядучы гісторыка-пазнавальных радыёпраграм на «Новым радыё Магілёў». У 1999—2011 гг. стваральнік гістарычных тэлеперадач для Магілёўскага абласнога і гарадскога тэлебачання. У 2001—2008 гг. суаўтар і вядоўца цыкла гістарычных перадач «З гісторыяй поруч» на прыватным гарадскім тэлеканале «2 канал. Магілёў». Адзін з ініцыятараў і суаўтар (разам з В.Валадзьковай) першай вучэбнай праграмы «Магілёвазнаўства» для навучальных школ горада Магілёва. У 1995 г. першым апрабаваў выкладанне курса «Магілёвазнаўства» на базе 7 класаў у СШ № 30 (Нацыянальная гімназія).

Адзін з арганізатараў усталявання ў Магілёве памятных дошак у гонар: асветніка Георгія Каніскага (1992), друкара Спірыдона Собаля (1993), кіраўніка абароны г. Магілёва ў 1941 г. генерала М. Раманава (1994), заслужанага дзеяча культуры Беларусі, тэатральнага рэжысёра Вялянціна Ермаловіча (2015).

Уваходзіў у склад Беларускага гістарычнага таварыства (2002—2009). З'яўляўся актыўным сябрам і адным з кіраўнікоў культурна-асветніцкай суполкі беларусаў г. Магілёва «Машэка» (1989—1999). Захапляўся аматарскім тэатрам пад кіраўніцтвам рэжысёра, заслужанага дзеяча культуры Беларусі Валянціна Ермаловіча (брат Міколы Ермаловіча).

Удзельнічаў ва ўстаноўчым з'ездзе Згуртавання беларусаў свету «Бацькаўшчына» ў 1990 годзе, быў дэлегатам пятага, шостага і сёмага з'ездаў беларусаў свету (2009, 2013, 2017). Уваходзіў у склад арганізацыйнага камітэта па падрыхтоўцы і правядзенні першага Міжнароднага фестывалю духоўнай хрысціянскай музыкі «Магутны Божа» (1993). У 1993—1995 гг. працаваў у складзе аргкамітэту па правядзенню фестывалю. Член гарадской камісіі па тапаніміцы і ўшанаванні гістарычнай і культурнай спадчыны Магілёва пры Магілёўскім гарвыканкаме (1992—2018) і архітэктурна-будаўнічага савета пры ўпраўленні архітэктуры і градабудаўніцтва Магілёўскага гарвыканкама (2014—2018); член грамадскага аб'яднання «Таварыства беларускай мовы імя Ф.Скарыны» (1995—2018), ГА "ЗБС «Бацькаўшчына». За дзейнасць па захаванні гісторыка-культурнай спадчыны грамадскім магістратам горада Магілёва прызнаны «Чалавек года — 2013».

У 2015—2016 гг. адзін з выканаўцаў грамадскага праекту «Магдэбургскія традыцыі на Магілёўшчыне» (кіраўнік праекту У. Лапцэвіч). У 2015 г. былі праведзены круглыя сталы аб традыцыях Магдэбургскага права ў Шклове, Чавусах, Чэрыкаве, Бялынічах, Крычаве, Горках, Бабруйску. У 2016 г. былі выраблены, падараваны і ўсталяваны з удзелам грамадскасці і мясцовых уладаў гранітныя інфармацыйныя дошкі аб Магдэбургскім праве ў Чэрыкаве, Чавусах і Бялынічах.

Творы

  • «Магілёўская даўніна ў пытаннях і адказах» (2-е выд., 1999, разам з Агеевым, Марзалюком)
  • «Магілёў на скрыжаванні» (2-е выд., 2000, разам з Агеевым)
  • «История Могилёвского еврейства. Кн. 1, Кн.2, Ч. І, II, III» (2002, 2006, 2009, 2011 калектыў аўтараў)
  • «Перекрёстки Могилёвской истории» (2004, разам з Агеевым, Клімуцём)
  • «Нацыянальныя меншасці БССР у грамадска-палітычным і культурным жыцці, 20-я гады XX ст.» (манаграфія, Магілёў, 2004)
  • «История профсоюзного движения Могилёвщины» (2005, разам з Агеевым)
  • Гістарычная і культурная спадчына горада Магілёва / Т.Л. Бажанава. — Магілёў: МДУХ, 2006. — 150 с. — 60 экз.
  • Юрый Бубнаў, Ігар Пушкін. Паліталогія / Т.Л. Бажанава. — Магілёў: МДУХ, 2006. — 176 с. — 60 экз.
  • «Нацыянальныя супольнасці Беларусі: грамадска-палітычная і культурна-асветніцкая дзейнасць (1990—2005 гг.)» (манаграфія, Магілёў, 2007)
  • «Могилёвщина. Легенды, события, люди» (2-е выд., 2008, разам з Курковым)
  • Узброены супраціў ва Усходняй Беларусі (20–30-я гады ХХ ст.). — Смаленск: Русіч, 2008. — 192 с. — 500 экз. — ISBN 5-93527-012-0.
  • «Узброены супраціў ва Усходняй Беларусі (20—30-я гады ХХ ст.)» (Мінск: Медысонт, 2009)
  • Удзел нацыянальных меншасцей у грамадска-палітычным жыцці Савецкай Беларусі (1919–1990 гг.). — Мінск: БДУ, 2010. — 320 с. — 100 экз. — ISBN 978-985-476-866-3.
  • «Места памяти русской истории: монография» (Варонеж, 2010, калектыў аўтараў)
  • «Гражданское общество и государство (очерки теории и практики взаимодействия)» (Магілёў, 2014, калектыў аўтараў)
  • «Гісторыя (гісторыя Беларусі ў кантэксце еўрапейскай цывілізацыі): канспект лекцый» (Магілёў: МДУХ, 2014)
  • «Политика управления этнокультурным разнообразием в Беларуси, Молдове и Украине: между советским наследием и европейскими стандартами: монография» (Вильнюс: ЕГУ, 2014, калектыў аўтараў)
  • «Нацыянальны сегмент грамадзянскай супольнасці Рэспублікі Беларусь» (манаграфія, Магілёў: МДУХ, 2015, калектыў аўтараў)
  • Спірыдон Собаль і вытокі магілёўскага кнігадруку (Мінск: Беларуская Энцыклапедыя імя Петруся Броўкі, 2016, калектыў аўтараў)
  • Фарміраванне і дзейнасць Магілёўскага Беларускага Камітэта (1917—1918): (манаграфія, Магілёў : МДУ імя А. А. Куляшова, 2017, разам з Агеевым)
  • Грамадзянская супольнасць і дзяржава. Станаўленне беларускага самакіравання (Магілёў:  МДУХ, 2017, разам з Агеевым)
  • Шляхамі БНР: Да 100-годдзя абвяшчэння Беларускай Народнай Рэспублікі (манаграфія, Гродна, 2018, калектыў аўтараў)
  • Латвия–Беларусь: 1918–2018 : [коллективная монография] (Минск: Четыре четверти, 2018)
  • Горад, які быў (Магілёў, 2018, калектыў аўтараў)
  • Грамадская і культурна-асветніцкая дзейнасць нацыянальных меншасцей у Беларускай ССР (1919-1991) : манаграфія (Магілёў : МДУХ, 2018)

Рэцэнзент кнігі Трусава і Агеева «Магілёўская ратуша. Лёс і адраджэнне» (2009).

Узнагароды

  • Памятны знак «2000 год хрысціянству» (2000).
  • Лаўрэат прэміі «Дасягненне» Магілёўскага гарвыканкама ў намінацыі «навука» (2003).
  • яго імя ўнесена ў «Кнігу гонару горада Магілёва» (2004).
  • медаль «60 год вызвалення Рэспублікі Беларусь ад нямецка-фашысцкіх захопнікаў» (2005).
  • Грамата Міністэрства адукацыі Рэспублікі Беларусь (2008).
  • Ганаровая грамата Міністэрства адукацыі Рэспублікі Беларусь (2014).

Зноскі

  1. ↑ Нацыянальныя меншасці БССР у грамадска-палітычным і культурным жыцці, 20-я гады XX ст. : Дыс…. канд. гіст. навук / Нац. акад. навук Беларусі. Ін-т гісторыі. Мінск, 2002. 145 с.

Літаратура

  • Пушкин И. А. // Кто есть Кто в Республике Беларусь. Люди дела: Энциклопедия. — Минск: УП «Энциклопедикс», 1999. — С. 134;
  • Пушкин И. А. // Кто есть Кто Деловой мир СНГ: Энциклопедия. — Минск: УП «Энциклопедикс», 2001. — С. 170;
  • Пушкін І. А. // Энцыклапедыя гісторыі Беларусі. Т. 6. Кн. 2. — Мінск: БелЭн, 2003. — С. 427;
  • Пушкин И. А. // Кто есть Кто в Республике Беларусь. Деловой мир СНГ: Энциклопедия. — Минск: УП «Энциклопедикс», 2006. — С. 305;
  • Пушкін І. А. // Корзенко, Г. В. Историки Беларуси в начале ХХІ столетия: биобиблиогр. справ. / Г. В. Корзенко. — Минск: Белорус. наука, 2007. — С. 309—310.

Спасылкі

Узята з "https://be.wikipedia.org/w/index.php?title=Ігар_Аляксандравіч_Пушкін&oldid=3285640"