Сацыяльна-гуманітарны каледж (Магілёў)
Сацыяльна-гуманітарны каледж | |
---|---|
Дата заснавання | 1913 |
Тып | каледж |
Дырэктар | Галіна Фёдараўна Клапоцкая |
Размяшчэнне | Магілёў |
Адрас | г. Магілёў, вул. Камсамольская, 18 |
sgk.msu.by | |
Сацыяльна-гуманітарны каледж установы адукацыі «Магілёўскі дзяржаўны ўніверсітэт імя А. А. Куляшова» — сярэдняя спецыяльная навучальная ўстанова ў г. Магілёў. Размешчаны на плошчы Арджанікідзэ ў будынку былога рэальнага вучылішча, па адрасе вул. Камсамольская, 18.
Гісторыя
Магілёўскае педагагічнае вучылішча, заснаванае ў 1913 г., рыхтавала настаўніц для царкоўна-прыходскіх і народных школ Магілёва і Магілёўскай губерні. Выпускала ў год 25-30 чалавек. Размяшчалася ў двухпавярховым будынку былога рэальнага вучылішча, у якім у 1967 г. надбудаваны яшчэ два паверхі, часткова зменены галоўны фасад.
У 1922 г. створаны Беларускі педагагічны тэхнікум Народнага камісарыята асветы БССР. У 1956 г. да яго далучана Мінскае дашкольнае педвучылішча, і ён атрымаў назву Магілёўскае дашкольнае педагагічнае вучылішча, якое рыхтавала кадры для сістэмы дашкольнага выхавання. У 1974 г. вучылішчу прысвоена імя К. Д. Ушынскага. З 1989 г. — вышэйшае педагагічнае вучылішча імя К. Д. Ушынскага, з 1992 г. — Магілёўскі дзяржаўны педагагічны каледж. Тут рыхтавалі навучэнцаў па спецыяльнасцях педагогіка і методыка пачатковага навучання, педагогіка і псіхалогія дашкольная. Прымаліся асобы з базавай і сярэдняй адукацыяй. Навучанне было дзённае і завочнае.
У 2004 г. пераўтвораны ў Сацыяльна-гуманітарны каледж установы адукацыі «Магілёўскі дзяржаўны ўніверсітэт імя А. А. Куляшова». Пасля рэарганізацыі на базе агульнай сярэдняй адукацыі навучанне вялося па спецыяльнасці праграмнае забеспячэнне інфармацыйных тэхналогій, страхавая справа. У 2012 г. набору не было.
Вядомыя выпускнікі
- Сцяпан Іванавіч Ліхадзіеўскі (1911—1979) — беларускі паэт, перакладчык, крытык, літаратуразнаўца.
- Васіль Каваль (1907—1937) — беларускі пісьменнік.
- Янка Шарахоўскі (1908—1973) — беларускі празаік, крытык, літаратуразнавец.
- Дзмітрый Якаўлевіч Бугаёў (нар. 1929) — беларускі літаратуразнавец і крытык.
- Юзэфа Фларыянаўна Мацкевіч (нар. 1911) — беларускі мовазнавец.
Вядомыя выкладчыкі
- Дзмітрый Антонавіч Палітыка (1915-1965) — беларускі савецкі крытык і літаратуразнаўца
Літаратура
- Беларуская энцыклапедыя : у 18 т. / рэдактар Г. П. Пашкоў. — Мінск, 1999. — Т. 9. — С. 469.
- Могилев : энциклопедический справочник / главный редактор И. П. Шамякин. — Минск, 1990. — С. 333.
- Сачанка, А. З'ядналіся сталасць і маладосць / А. Сачанка // Пралеска. — 2003. — № 12. — С. 7-9.