Будынак былога яўрэйскага рамеснага вучылішча (Магілёў)

Славутасць
Будынак былога яўрэйскага рамеснага вучылішча
53°53′53,34″ пн. ш. 30°19′24,60″ у. д.
Краіна	Беларусь
Горад	Магілёў
Архітэктурны стыль	эклектызм
Дата заснавання	1903
Дата пабудовы	1903 год
Статус	Гісторыка-культурная каштоўнасць Беларусі, шыфр 513Г000044

Будынак былога яўрэйскага рамеснага вучылішча — будынак у Магілёве, размешчаны на рагу вуліц Вароўскага і Пляханава, 11/23. Помнік эклектычнай архітэктуры. Пабудаваны ў 1903 годзе з цэглы. Цяпер адзін з будынкаў Магілёўскага дзяржаўнага машынабудаўнічага прафесійна-тэхнічнага каледжа.

Архітэктура

Фасад па вул. Пляханава

Будынак двухпавярховы, прамавугольны ў плане, на высокім цокалі, неатынкаваны. Фасады вылучаны па вул. Вароўскага рызалітамі, завершанымі ступеньчатымі атыкамі, і ўвенчаны карнізам з сухарыкамі. Уваход з боку дваровага фасада. Першы паверх вулічных фасадаў дэкарыраваны рустам. Вокны першага паверха прамавугольныя з ліштвамі, другога — паўцыркульныя, маюць арачныя абрамленні з замковым каменем. У прасценках — дэкаратыўныя ўстаўкі з цэглы.

Мемарыяльная дошка

У 1968 годзе на будынку ўстаноўлена мемарыяльная дошка на ўшанаванне памяці аднаго з 26 бакінскіх камісараў М. В. Басіна, які скончыў гэта вучылішча ў 1909 годзе.

Літаратура

• Збор помнікаў гісторыі і культуры Беларусі. Магілёўская вобласць / АН БССР, Ін-т мастацтвазнаўства, этнаграфіі і фальклору; Рэд. кал.: С. 13. Марцэлеў (гал. рэд.) і інш.— Мн.: Беларус. Сав. Энцыклапедыя, 1986.— 408 с., іл.

Спасылкі

• На Вікісховішчы ёсць медыяфайлы па тэме Будынак былога яўрэйскага рамеснага вучылішча (Магілёў)