Дахавы завод ТэхнаНІКОЛЬ
| ЗТАА «Дахавы завод ТэхнаНІКОЛЬ» | |
|---|---|
| Тып | Завод кампаніі ТэхнаНІКОЛЬ |
| Заснаванне | 1973 |
| Ранейшыя назвы |
Асіповіцкі кардонна-руберойдавы завод Адкрытае акцыянернае таварыства «Дах» |
| Размяшчэнне | Асіповічы, Магілёўская вобласць |
| Галіна | Прамысловасць будаўнічых матэрыялаў |
| Прадукцыя | дахавыя і гідраізаляцыйныя матэрыялы |
| Матчына кампанія | ТэхнаНІКОЛЬ |
ЗТАА «Дахавы завод ТэхнаНІКОЛЬ» — прадпрыемства Беларусі расійскай карпарацыі ТэхнаНІКОЛЬ з поўным закончаным тэхналагічным цыклам вытворчасці мяккіх дахавых матэрыялаў у Асіповічах Магілёўскай вобласці.
Гісторыя[правіць | правіць зыходнік]
Будаўніцтва Асіповіцкага кардонна-руберойдавага завода пачалося ў лістападзе 1967 года і скончылася 28 красавіка 1973 года. Для рабочых завода працавалі сталовая, буфет, пункт выдачы малака, здраўпункт. Быў пабудаваны Дом культуры з кіназалай на 400 месцаў, інтэрнат на 216 месцаў, прадуктовы магазін, дзіцячы камбінат з басейнам на 420 месцаў, 6 жылых дамоў, 4 — кааператыўныя, Дом абрадаў. У 1974 годзе завод атрымаў усесаюзнае прызнанне і стаў пераможцам спаборніцтва з уручэннем Чырвонага сцяга ЦК КПСС, Савета Міністраў СССР, УЦСПС і ЦК УЛКСМ.
Пры Доме культуры завода дзейнічаў ансамбль народнай песні і музыкі «Дзівакі», вакальна-інструментальны ансамбль, дзіцячыя аркестр народных інструментаў і клуб выхаднога дня.
З 1994 года завод пераўтвораны ў адкрытае акцыянернае таварыства «Дах». З 12 сакавіка 1999 года — сумеснае беларуска-брытанскае прадпрыемства ААТ «Дах».
Па стане на 1995 год прадпрыемства валодала магутнасцю на выпуск 55 тыс. т кардону і 127 млн м2 дахавага пакрыцця за год. Тэхналагічнае абсталяванне для вырабу кардону пастаўлена фірмай «Fampa» (Польшча).
У 2005 годзе СП ААТ «Дах» увайшло ў склад расійскай кампаніі «Тэхнаніколь», што дазволіла абнавіць вытворчыя фонды і ўкараніць новыя тэхналогіі, павялічыць аб’ем і пашырыць асартымент выпусканай заводам прадукцыі.
У чэрвені 2011 года на тэрыторыі СП ААТ «Дах» зарэгістравана ЗТАА Дахавы завод «ТэхнаНіколь». У 2012 годзе СП ААТ «Дах» ажыццявіла перадачу вытворчых магутнасцяў для выпуску прадукцыі ЗТАА Дахавы завод ТэхнаНІКОЛЬ.
У 2017 годзе ЗТАА Дахавы завод ТэхнаНІКОЛЬ уключаны ў рэестр упаўнаважаных эканамічных аператараў Еўразійскага эканамічнага саюза, а ў 2017 годзе завод зарэгістраваны ў якасці рэзідэнта свабоднай эканамічнай зоны «Магілёў».
У 2019 годзе на заводзе была адкрыта новая вытворчасць па выпуску цеплаізаляцыйных матэрыялаў з экструзійнага пенапалістыролу.
Прадукцыя[правіць | правіць зыходнік]
З 2001 года на прадпрыемстве наладжана вытворчасць дахавых і гідраізаляцыйных матэрыялаў пры дапамозе тэхналагічнай лініі фірмы «Poliglass» (Італія).
Асноўнай прадукцыяй прадпрыемства з’яўляецца дахавы кардон, руберойд розных марак, пергамін, пясчана-цэментавая чарапіца, сценавыя блокі, тратуарныя пліты.
На Дахавым заводзе ТэхнаНІКОЛЬ асвоены новыя віды дахавых і гідраізаляцыйных матэрыялаў на аснове бітумнага і бітумна-палімернага кампанентаў (біпалікрын і бікрын) з палепшанымі трываласнымі і эксплуатацыйнымі паказчыкамі.
Імпарт[правіць | правіць зыходнік]
Прадукцыя прадпрыемства пастаўляецца ў краіны СНД, Балтыі, Балгарыю, Польшчу, Албанію.
Літаратура[правіць | правіць зыходнік]
- Асіповіцкі кардонна-руберойдавы завод // Беларуская энцыклапедыя: У 18 т. Т. 2: Аршыца — Беларусцы / Рэдкал.: Г. П. Пашкоў і інш. — Мн. : БелЭн, 1996. — Т. 2. — С. 32. — 10 000 экз. — ISBN 985-11-0035-8. — ISBN 985-11-0061-7 (т. 2).
- Памяць: Асіповіцкі раён. З гісторыі прадпрыемстваў раёна. С. 605.
- Грынько, М. Ф. Рулонных дахавых і гідраізаляцыйных матэрыялаў прамысловасць / М. Ф. Грынько // Беларуская энцыклапедыя: У 18 т. Т. 13: Праміле — Рэлаксін / Рэдкал.: Г. П. Пашкоў і інш. — Мн. : БелЭн, 2001. — Т. 13. — С. 439—440. — 10 000 экз. — ISBN 985-11-0035-8. — ISBN 985-11-0216-4 (т. 13).