Сокал (замак)

Замак Сокал на гравюры С. Пахалавіцкага (1579 г.)

Замак Сокал існаваў у XVI ст. каля вёскі Сакалішча (цяпер Расонскі раён, Беларусь). Збудаваны ў 1566 г. падчас Лівонскай вайны па загадзе Івана IV Грознага як парубежная крэпасць. Аблога замка Сокал у 1579 г. завяршылася ўзяццем яго войскамі караля Стэфана Баторыя і яго поўным разбурэннем.

Апісанне

Планіроўка і памеры замка вызначаліся мысам пры зліцці рэк Дрыса і Нішча. Паўавальны ў плане замак, разгорнуты паўавальнай часткай у бок стрэлкі мыса, меў 10 вежаў, якія былі падзелены на 2-3 яруса і мелі баявыя памяшканні і амбразуры. 4 вежы былі чатырохвугольнымі і завяршаліся двухсхільным дахам. Астатнія вежы былі васьмівугольнымі, з высокім шатровым дахам. Вежы стаялі на высокіх насыпах і злучаліся абарончымі сценамі. У сцяне, процілеглай закругленай частцы, размяшчаліся арачная брама пад двухсхільным дахам і дзвюма байніцамі па баках. Густая драўляная забудова дзяцінца займала амаль палову яго тэрыторыі. Цэнтрам замкавай кампазіцыі была царква на невялікай плошчы, якую атачалі прамавугольныя ў плане хаты. Вылучаліся два вежападобныя збудаванні: адно з іх з купальным завяршэннем мела рэнесансныя рысы.

Замак адлюстраваны на гравюры, зробленай па малюнку С. Пахалавіцкага (1579 г.).

Літаратура

• Якімовіч Ю. Замак Сокал / Вялікае княства Літоўскае: энцыклапедыя. У 2 т. Т. 2. Мн.: БелЭн, 2006. — 792 с. — С. 618—619.
• «Со́кал» // Беларуская энцыклапедыя: У 18 т. Т. 15: Следавікі — Трыо / Рэдкал.: Г. П. Пашкоў і інш. — Мн. : БелЭн, 2002. — Т. 15. — С. 77—78. — 10 000 экз. — ISBN 985-11-0035-8. — ISBN 985-11-0251-2 (т. 15).

Спасылкі

• Сокал (замак) на сайце «Архіварта»