Уладзіслаў Якаўлевіч Рубанаў

Уладзіслаў Якаўлевіч Рубанаў
Асабістыя звесткі
Дата нараджэння	15 снежня 1952(1952-12-15)
Месца нараджэння	Аляксандраўка 1, Гіжэнскі сельсавет, Слаўгарадскі раён, Магілёўская вобласць, БССР, СССР
Дата смерці	21 ліпеня 1994(1994-07-21) (41 год)
Пахаванне	Міханавіцкія могілкі
Грамадзянства	Беларусь
Альма-матар	факультэт журналістыкі БДУ
Месца працы	Полымя Мастацкая літаратура
Прафесійная дзейнасць
Род дзейнасці	паэт, пісьменнік
Мова твораў	беларуская

Уладзіслаў Якаўлевіч Руба́наў (15 снежня 1952, вёска Аляксандраўка 1, Слаўгарадскі раён, Магілёўская вобласць — 21 ліпеня 1994) — беларускі празаік.

Біяграфія

Нарадзіўся 15 снежня 1952 года ў в. Аляксандраўка 1 Слаўгарадскага раёна Магілёўскай вобласці ў сям’і настаўніка.

Закончыў Аляксандраўскую васьмігодку, Слаўгарадскую СШ (1970), факультэт журналістыкі Беларускага дзяржаўнага ўніверсітэта (1975). З 1975 года працаваў карэспандэнтам, адказным сакратаром старадарожскай раённай газеты «Поступ Кастрычніка», з 1978 года — у аддзеле прозы часопіса «Полымя», з 1986 — загадчыкам рэдакцыі прозы выдавецтва «Мастацкая літаратура».

Памёр 21 ліпеня 1994 года. Пахаваны на Міханавіцкіх могілках.

Творчасць

У друку выступаў з 1972 года. Стала творчай працай пачаў займацца з 1976 г. Першая кніга выйшла ў 1981 годзе пад назвай «Вокны без фіранак». Яго аповесці («Каштаны», «Грыбавар», «Разам па жыцці») і апавяданні заснаваны на сучасным матэрыяле. Цікавілі тэмы: маральна-этычныя і сацыяльна-псіхалагічныя аспекты жыцця вёскі і горада, духоўны свет сучасніка, праблема вясковага чалавека ў горадзе. Пісьменнік адчуваў небяспеку духоўнага Чарнобыля («Замах»), імкнуўся паказаць лепшыя традыцыі сялянскага побыту, сцвярджаў высокастаноўчыя рысы характару вяскоўцаў старэйшага пакалення: працавітасць, гаспадарлівасць, любоў і прыхільнасць да зямлі і прыроды. Стварыў паэтычны вобраз Мінска ў аповесці «Каштаны». Аўтар рамана «Не аднойчы забіты».

Узнагароды

• Літаратурная прэмія СП Беларусі імя І. Мележа (1990) — за кнігу «Таямніца птушынага гнязда».

Літаратура

• Савік Л. С. Рубанаў Уладзіслаў Якаўлевіч // Беларуская энцыклапедыя: У 18 т. Т. 13: Праміле — Рэлаксін / Рэдкал.: Г. П. Пашкоў і інш. — Мн. : БелЭн, 2001. — Т. 13. — С. 418. — 10 000 экз. — ISBN 985-11-0035-8. — ISBN 985-11-0216-4 (т. 13).
• Рубанаў Уладзіслаў // Беларускія пісьменнікі : біябібліяграфічны слоўнік : у 6 т. / пад рэдакцыяй А. В. Мальдзіса. — Мінск, 1995. — Т.5. — С. 56-157.

Спасылкі

• Рубанаў Уладзіслаў Якаўлевіч Архівавана 19 снежня 2018.