Чырвонаслабодскае падняцце

Чырвонаслабодскае падняцце (ад назвы вёскі Красная Слабада ў Акцябрскім раёне) — тэктанічная структура ў Петрыкаўскім і Акцябрскім раёнах Гомельскай вобласці Беларусі, у межах Чырвонаслабодска-Маладушынскай ступені Прыпяцкага прагіну. Выяўлена сейсмаразведкай у 1968 годзе.

Па паверхні фундамента і падсалявых дэвонскіх адкладах Чырвонаслабодскае падняцце — прыразломнае, з уздымам гарызонтаў на поўдзень да аднайменнага субрэгіянальнага разлому, ускладненае малаамплітудным (да 100 м) разрыўным парушэннем. Памеры 18×3,5 км, амплітуда 300 м. Мінімальная адзнака паверхні фундамента ў скляпенні −1800 м, падсалявых адкладаў −1100 м. Па міжсалявых адкладах Чырвонаслабодскае падняцце — брахіантыкліналь субшыротнага распасцірання памерам 15×3 км, амплітудай да 200 м, паўднёвае крыло якой ускладняецца зонай размыву міжсалявых адкладаў шырынёй да 1,5 км уздоўж аднайменнага разлому. Мінімальная адзнака ў скляпенні −900 м. Скляпенне ссунута адносна галаўной часткі падсалявога блока на 4 км на паўночны захад. Па паверхні верхняй саляноснай тоўшчы Чырвонаслабодскае падняцце — антыкліналь субшыротнага распасцірання памерам 11×3 км, амплітудай каля 50 м, ссунута адносна міжсалявой на 2 км на паўночны захад.

Літаратура

• Чырвонаслабодскае падняцце // Энцыклапедыя прыроды Беларусі. У 5-і т. Т. 5. Стаўраструм — Яшчур / Рэдкал. І. П. Шамякін (гал. рэд.) і інш. — Мн.: БелСЭ імя Петруся Броўкі, 1986. — 583 с., іл. — 10 000 экз.