Даўжыня цела з адросткам да 10 см, з шырокім дахападобным плоскім карапаксам — шчытком (адсюль назва), на якім спераду размешчана пара складаных (фасетчных) вачэй і няпарнае простае вочка. На галаве 5 пар, на грудзях да 70 пар грудных лістападобных ног, вонкавая частка якіх пераўтворана ў жабры. Брушка сегментаванае, з адросткам (тэльсанам) і парай доўгіх ніткападобных прыдаткаў.
Вядомы з верхняга карбону, выкапнёвыя вельмі падобныя да сучасных. Адносяцца да адзінага сямейства Triopsidae з двума родамі Triops і Lepidurus. У сусветнай фаўне адрозніваецца да некалькіх дзясяткаў сучасных відаў.
Раздзельнаполыя, але самцы трапляюцца значна радзей за самак, таму размнажэнне пераважна партэнагенетычнае. Самкі выносяць яйцы ў яйцавых мяшках на 11-й пары грудных ног, адкладваюць іх на дно вадаёма, дзе яны зімуюць. Яйцы вельмі жыццяздольныя (да 15 гадоў пасля высыхання і прамярзання ажываюць). Лічынкі — наупліусы. Развіццё з метамарфозай. Працягласць жыцця да 1 месяца.
Кормяцца дэтрытам, парасткамі водных раслін, дробнымі воднымі жывёламі. Паядаюць малькоў рыб, чым шкодзяць рыбнай гаспадарцы. Пажыва для рыб і вадаплаўных птушак.
