Юзаф Кунц
Юзаф Кунц | |
---|---|
Johan Kunz | |
Род дзейнасці | прамысловец |
Дата нараджэння | 1831 |
Месца нараджэння | |
Дата смерці | 6 (19) кастрычніка 1907 |
Месца смерці | |
Месца пахавання | |
Грамадзянства |
Аўстрыйская імперыя Расійская імперыя |
Жонка | Францішка Кунц |
Дзеці | Ігнацій, Вацлаў, Франц, Францішак, Юлія |
Месца працы | Гродзенскі піўзавод |
Юзаф Кунц (ням.: Johan Kunz, польск.: Józef Kunc, руск.: Осип Матвеевич Кунц; 1831, Ракіцаны — 6 кастрычніка 1907, Гродна) — гродзенскі прадпрымальнік, заснавальнік Гродзенскага піўзавода.
Біяграфія[правіць | правіць зыходнік]
Нарадзіўся ў горадзе Ракіцаны ў Аўстрыйскай імперыі (сёння ў Пльзенскім краі Чэшскай Рэспублікі). Быў аўстрыйскім падданым, скончыў піваварскія курсы ў Празе[1].
Пераехаў у Расійскую імперыю і ў 1868 або 1870 годзе запусціў у Гродне ўласны бровар. Для гэтага ён выкупіў былы палац Агінскіх, які ў дзесяцігоддзі пасля падзелаў Рэчы Паспалітай мясцовыя купцы выкарыстоўвалі як склад тавараў[2].
Юзаф Кунц прывёз у Гродна чэшскія традыцыі, рэцэпты і тэхналогіі варкі піва. Ён быў адным з першых, хто варыў у Гродне класічны еўрапейскі лагер. Акрамя піўзавода, Кунц валодаў у Гродне двума тракцірамі. У 1897 годзе перадаў кіраванне броварам сынам Ігнацію і Францу[3].
Кунц быў актыўны ў грамадскім і палітычным жыцці горада. У 1890 годзе быў кандыдатам у губернскую падатковую інспекцыю. У 1902 годзе — ужо ў складзе Гродзенскай падатковай інспекцыі, а таксама чалец праўлення добраахвотнай пажарнай дружыны. У 1906 годзе — у складзе гарадскога савета.
Памёр у 1907 годзе. Пахаваны на Фарных могілках у Гродне ў сямейным склепе разам з жонкай Францішкай і сынам Францішкам.
Сям’я[правіць | правіць зыходнік]
Ажаніўся з Францішкай Кунц (1840 — 18.06.1903). Яны мелі не менш за пецярых дзяцей:
- Ігнація (1867 — 19.10.1911), які кіраваў піўзаводам з 1897 года пасля адыходу бацькі ад спраў;
- Франца, кампаньёна Ігнація ў кіраванні піваварскім бізнесам;
- Вацлава (13.09.1870 — 12.01.1957), кіраўніка бровара «W. Kunc» у Сувалках[4], які актыўна ўдзельнічаў у дзейнасці прадпрыемстваў буйнога беластоцкага прымыслоўца Антонія Іпаліта Вячоркі пасля яго смерці;
- Юлію, другую жонку беластоцкага прамыслоўца Антонія Іпаліта Вячоркі;
- Францішка (1868 — 16.04.1937), касіра гродзенскага магістрата, гаспадара летняга клуба, чальца таварыства «Муза», камітэта рэстаўрацыі Фары Вітаўта (1922) і камітэта па барацьбе з дарагавізнаю (1923).
Зноскі
- ↑ “Лагер” по чешским рецептам, самоубийство и 6 млн бутылок. Чем прославились первые владельцы гродненского пивзавода (руск.) . Hrodna.life (19 ліпеня 2023). Праверана 19 ліпеня 2023.
- ↑ Гродзенскі Бровар . harodnia.com. Праверана 19 ліпеня 2023.
- ↑ Андрэй Вашкевіч. На гродзенскім бруку. — Гродна: ЮрСаПринт, 2012. — С. 27—33. — 92 с. — ISBN 978-985-90264-10-12.
- ↑ W Suwałkach mamy Bulwary imienia Wacława Kunca. Od ulicy 1 Maja do mostu przy Wojska Polskiego | suwalki24.pl - Suwalski Dziennik Internetowy (Suwałki, Augustów, Sejny, Suwalszczyzna) (польск.). www.suwalki24.pl. Праверана 19 ліпеня 2023.