Ніколь дэ Бур

Ніколь дэ Бур
Дата нараджэння	20 снежня 1970(1970-12-20) (53 гады)
Месца нараджэння	Таронта, Антарыа, Канада
Грамадзянства	Канада
Муж	John Kastner[d]
Прафесія	тэлеактрыса, кінаактрыса, акцёрка
IMDb	ID 0207498
Медыяфайлы на Вікісховішчы

Ніколь дэ Бур (англ.: Nicole de Boer, фр.: Nicole de Boer; нар. 20 снежня 1970, Таронта) — канадская актрыса тэатра, кіно і тэлебачання.

Біяграфія

Ніколь дэ Бур нарадзілася 20 снежня 1970 года ў Таронта. Па ўспамінах бацькоў яна была сарамлівым дзіцёнкам, і яны вельмі здзівіліся, калі дзяўчынка атрымала ролю ў школьнай п’есе «Чараўнік краіны Оз», дзе сыграла галоўную ролю. Заўважыўшы вялікую цікавасць дачкі да акцёрскага майстэрства, бацькі дапамаглі ёй знайсці агента. З васьмі гадоў Ніколь рэгулярна іграла ў тэатральных пастаноўках і ўдзельнічала ў тэлешоу.

Упершыню Ніколь з’явілася на тэлебачанні ў адным эпізодзе серыяла «Standing Room Only», калі ёй было 11 гадоў. Першую прыкметную ролю актрыса сыграла ў 17 гадоў — гэта была роля Эрын Джонс у пяці эпізодах серыяла «9B». Далей была роля ў скетч-камедыі «Дзеці ў калідоры». 18-гадовая Ніколь сыграла Лаўру, дзяўчыну Бобі Тэранса. Праз восем гадоў у 1996 годзе актрыса з’явілася ў поўнаметражнай камедыі той жа скетч-групы «Дзеці ў калідоры: Цукерка для мозгу».

У 1992 годзе Ніколь дэ Бур атрымала першую ролю ў поўнаметражным фільме, слэшары «Выпускны 4: Збаў нас ад зла». Ніколь выступіла ў ролі Міган — дзяўчыны, якая разам са сваімі сябрамі вымушана супрацьстаяць крыважэрнаму маньяку ў дзень уласнага выпускнога. Праз год была невялікая роля ў тэлевізійным драматычным фільме «Сямейныя карцінкі», у якім Ніколь сыграла Пэні. Гэты фільм з удзелам актрысы застаўся мала заўважаным гледачамі. У 1995 годзе Ніколь дэ Бур была зацверджана на ролю Мэг Сміт у падлеткавай камедыі «Вялікае падарожжа» рэжысёра Келі Макін. У 1997 годзе Ніколь выканала ролю Юны ў фантастычным серыяле «Чорная бездань». Гэты праект Ніколь дэ Бур таксама не набыў асаблівай папулярнасці.

Першае прызнанне прыйшло да Ніколь дэ Бур у 1997 годзе. Годам раней яна паўдзельнічала ў кастынгу псіхалагічнага фільма жахаў «Куб» рэжысёра Вінчэнца Наталі. Па выніках кастынга актрыса атрымала ролю Джаан Левен, школьніцы, якая пры дапамозе сваіх матэматычных здольнасцяў вылічвала бяспечныя пакоі ў таямнічым кубе, дзе кожны неасцярожны крок мог прывесці да смерці. Фільм атрымаў прызнанне гледачоў і станоўчыя ацэнкі крытыкаў, стаўшы культавым прадстаўніком свайго жанру. Услед за паспяховым «Кубам» былі зняты яго сіквэл «Куб 2: Гіперкуб» і прыквэл «Куб Нуль» — аднак у іх актрыса не здымалася.

З 2002 па 2007 год Ніколь дэ Бур выканала ролю Сары Банерман у серыяле «Мёртвая зона», заснаваным на рамане Стывена Кінга. Яе партнёрамі па фільме сталі Энтані Майкл Хол і Крыс Бруна. Серыял быў вельмі цёпла прыняты крытыкамі і некалькі разоў намініраваўся на прэмію «Сатурн» як найлепшы тэлесерыял. «Мёртвая зона» таксама прыйшлася даспадобы як аматарам Стывена Кінга, так і проста любіцелям дэтэктываў: серыял заваяваў высокія рэйтынгі на сайтах многіх анлайн-кінатэатраў. Ніколь дэ Бур іграе ва ўсіх шасці сезонах серыяла.

Наступны важны эпізод у кар’еры Ніколь дэ Бур — роля Элісан Портэр у прыгодніцкім фантастычным серыяле «Зорная брама: Атлантыда». Фільм прыйшоўся даспадобы як гледачам, так і крытыкам. Серыял быў намініраваны на многія прэстыжныя кінаўзнагароды, у тым ліку на прэмію «Эмі».

Асабістае жыццё

18 снежня 1999 года Ніколь дэ Бур выйшла замуж за вакаліста гурта «All Systems Go» Джона Кастнера. Муж актрысы таксама вядомы як кампазітар, у прыватнасці ён працаваў над фільмамі «Універсальны салдат» і «Глыток». У студзені 2007 года ў пары нарадзілася дачка, Самер Лі. З 2012 года Джон і Ніколь жылі асобна, а праз год развяліся.

Выбраная фільмаграфія

• 1992 — «Выпускны 4: Збаў нас ад зла»
• 1995 — «Вялікае падарожжа»
• 1996 — «Дзеці ў калідоры: Цукерка для мозгу»
• 1997 — «Куб»
• 2009 — «Глыток»

Спасылкі

• Ніколь дэ Бур на сайце «Internet Movie Database»