Майсей Калінікавіч Юскавец

Майсей Калінікавіч Юскавец
Дата нараджэння	16 жніўня 1898(1898-08-16)
Месца нараджэння	Заверша, Кобрынскі павет, Гродзенская губерня, Літоўскае генерал-губернатарства, Расійская імперыя
Дата смерці	23 красавіка 1969(1969-04-23) (70 гадоў)
Грамадзянства	Расійская імперыя  СССР
Род дзейнасці	навуковец
Навуковая сфера	ветэрынарыя
Месца працы	Маскоўскі зоаветэрынарны інстытут[d] Усесаюзная акадэмія сельскагаспадарчых навук імя Леніна Навукова-практычны цэнтр НАН Беларусі па жывёлагадоўлі Беларускі навукова-даследчы ветэрынарны інстытут Акадэмія сельскагаспадарчых навук БССР
Навуковая ступень	доктар ветэрынарных навук
Навуковае званне	акадэмік НАНБ, акадэмік АСГН БССР
Альма-матар	Маскоўская дзяржаўная акадэмія ветэрынарнай медыцыны і біятэхналогіі імя К. І. Скрабіна[d] (1925)
Вядомы як	ліквідатар бруцэлёзу сельскагаспадарчых жывёл у БССР
Узнагароды

Майсей Калінікавіч Юскавец (16 жніўня 1898, вёска Заверша, Драгічынскі раён, Брэсцкая вобласць — 23 красавіка 1969) — беларускі вучоны ў галіне ветэрынарыі. Акадэмік АН БССР (1950), акадэмік Акадэміі сельскагаспадарчых навук БССР (1957—1961), доктар ветэрынарных навук (1941), прафесар (1943). Заслужаны дзеяч навукі БССР (1958). Удзельнік Грамадзянскай вайны і Вялікай Айчыннай вайны.

Біяграфія

Скончыў Маскоўскі ветэрынарны інстытут (1925). У 1928—1935 гадах — асістэнт, дацэнт, намеснік дырэктара Маскоўскага зоаветэрынарнага інстытута. У 1936-39 гг. — член ветэрынарнай секцыі УАСГНІЛ. З 1941 па 1943 год — на фронце, ваентветурач 2-га рангу, эпізаатолаг. У 1943—1949 гадах — кіраўнік эпізааталагічнай службы Галоўнага ветэрынарнага ўпраўлення Міністэрства сельскай гаспадаркі СССР. З 1950 года — поўнасцю на рабоце ў БССР: у 1950—1956 гадах — у Інстытуце жывёлагадоўлі, у 1957—1959 — дырэктар Беларускага навукова-даследчага ветэрынарнага інстытута. У 1957—1961 гадах акадэмік-сакратар Аддзялення жывёлагадоўлі і ветэрынарыі Акадэміі сельскагаспадарчых навук БССР, у 1961—1969 — загадчык аддзела мікрабіялогіі і імуналогіі Беларускага навукова-даследчага ветэрынарнага інстытута.

Навуковы і практычны ўклад

Працы па эпізааталогіі, мікрабіялогіі, імуналогіі, пытаннях барацьбы з хваробамі сельскагаспадарчых жывёл. Распрацаваў і ўвёў у практычны ўжытак сістэму паскоранага аздараўлення гаспадарак пры сухотах буйной рагатай жывёлы, распрацаваў і ўвёў ва ўжытак прыгатаванне вакцыны са штаму бруцэл, вывучыў імунагенез пры прышчэпках названай вакцыны, сістэму мерапрыемстваў па ліквідацыі бруцэлёзу сельскагаспадарчых жывёл. Распрацаваная ім вакцына дазволіла поўнасцю ліквідаваць бруцэлёз у рэспубліцы.

Аўтар больш за 150 навуковых і навукова-папулярных прац, у тым ліку 5 манаграфій. Распрацаваў напрамкі дзейнасці наноў створанага пасля вайны Беларускага навукова-даследчага ветэрынарнага інстытута, укамплектаваў інстытут навуковымі кадрамі, стварыў беларускую школу ветэрынарыі.

Узнагароды

Узнагароджаны ордэнамі Леніна (1954), «Знак Пашаны» (1958, 1968). Яго імем названая сярэдняя школа ў вёсцы Заверша Драгічынскага раёна, дзе ён вучыўся.

Асноўныя працы

• Бруцеллез сельскохозяйственных животных. 2 изд. — М.: Сельхозгиз, 1960.
• Туберкулез сельскохозяйственных животных и птиц. 3 изд. — Мн.: Сельхозгиз БССР, 1963.

Літаратура

• Беларусь: энцыклапедычны даведнік / Рэдкал. Б. І. Сачанка (гал. рэд.) і інш.; Маст. М. В. Драко, А. М. Хількевіч. — Мн.: БелЭн, 1995. — С. 784. — 800 с. — 5 000 экз. — ISBN 985-11-0026-9.

Спасылкі

• Акадэмік Юскавец Майсей Калінікавіч
• Майсей Калінікавіч Юскавец у базе даных «История белорусской науки в лицах» Цэнтральнай навуковай бібліятэкі імя Якуба Коласа НАН Беларусі (руск.)
• Моисей Калинникович Юсковец (К 110-летию со дня рождения). — Весці Нацыянальнай акадэміі навук Беларусі. Серыя аграрных навук. — 2008. — № 4. — С. 111—112.
• Юскавец Майсей Калінікавіч на сайце анлайн-энцыклапедыі «Беларусь у асобах і падзеях»