Слонімскі біялагічны заказнік
| Слонімскі біялагічны заказнік | |
|---|---|
| Размяшчэнне | Беларусь, Гродзенская вобласць, Слонімскі раён |
| Найбліжэйшы горад | Слонім |
| Плошча | 4812,73 га |
| Дата заснавання | 27 снежня 2007 |
  Слонімскі біялагічны заказнік |
|
 Слонімскі біялагічны заказнік |
|
Рэспубліканскі біялагічны заказнік «Слонімскі» абвешчаны з мэтай захавання ўнікальнага ляснога комплексу, у межах якога знаходзяцца месцы рассялення раслін і жывёл, якія адносяцца да відаў змешчаных у Чырвонай кнізе Рэспублікі Беларусь і ахоўваюцца ў адпаведнасці з міжнароднымі дагаворамі.
Месца знаходжання
[правіць | правіць зыходнік]Заказнік размешчаны ў прыгараднай зоне горада Слонім у Альбярцінскім лясніцтве Дзяржаўнай лесагаспадарчай установы «Слонімскі лясгас» на плошчы 4815 га. Да ўсходняй мяжы заказніка непасрэдна прылягае рэспубліканскі ландшафтны заказнік «Стронга».
Рэльеф
[правіць | правіць зыходнік]На тэрыторыі заказніка спалучаюцца ўзвышаныя ўзгорыста-марэнна-эразійныя і сярэдневышынныя другасныя водна-ледніковыя ландшафты, якія дрэнажуюцца ракой Іса з яе шматлікімі дробнымі прытокамі, вялікая колькасць з якіх маюць крынічныя комплексы. У межах заказніка пануюць вышыні 160—170 м, амплітуда вагання рэльефу складае каля 30 метраў, што стварае маляўнічы краявід.
Расліннасць
[правіць | правіць зыходнік]Флора заказніка мае ярка выяўленыя рысы пераходу ад сярэднееўрапейскай з барэальнымі элементамі да лесастэпавай. У экалагічным аспекце тут дамінуюць лясныя, балотныя, лугава-балотныя віды, у меншай ступені прадстаўлены водныя і пустынна-палявыя.
Заказнік ахоплівае лясны масіў, у якім пераважаюць хвойнікі (імшыстыя, верасова-імшыстыя, чарнічныя, арляковыя і інш.), бярэзнікі і ельнікі; трапляюцца чорналешнікі, асіннікі, дубровы.
Лясная і водна-балотная расліннасць адрозніваюцца добрай захаванасцю, тут адсутнічаюць вялікія па плошчы высечкі, значная частка вадацёкаў і балот знаходзіцца ў натуральным стане. На тэрыторыі заказніка выяўлена 16 ахоўных відаў раслін, прычым шэраг з іх (асабліва прадстаўнікі сямейства архiдных) з'яўляюцца вельмі рэдкімі ў рэспубліцы ці вядомыя з адзінкавым месцазнаходжаннем у межах Гродзенскай вобласці.
Асноўныя лекавыя расліны: ядловец звычайны, ландыш майскі, крапіва двухдомная і інш. Адзначаны месцы росту ахоўнага віду кадзіла сармацкага.
Жывёльны свет
[правіць | правіць зыходнік]На тэрыторыі заказніка знойдзена пасяленне 22 відаў млекакормячых, што складае каля 30% ад агульнага іх складу на тэрыторыі Беларусі. Таксама зарэгістравана 102 відаў птушак. Асноўная маса гэтых відаў належаць да ляснога экалагічнага комплексу.