Арэстэ Саламонэ

Арэстэ Саламонэ
італ.: Oreste Salomone
Дата нараджэння	20 верасня 1879(1879-09-20)
Месца нараджэння	Капуя, правінцыя Казерта, Кампанія, Італія
Дата смерці	2 лютага 1918(1918-02-02) (38 гадоў)
Месца смерці	Падуя, правінцыя Падуя, Венета, Італія
Грамадзянства	Каралеўства Італія
Прыналежнасць	Каралеўства Італія
Род войскаў	пяхота, ваенна-паветраныя сілы
Гады службы	1897—1918
Званне	маёр
Бітвы/войны	Італа-турэцкая вайна, Першая сусветная вайна
Узнагароды і званні	Медаль «За воінскую доблесць»
Медыяфайлы на Вікісховішчы

Арэстэ Саламонэ (італ.: Oreste Salomone; 20 верасня 1879 — 2 лютага 1918) — італьянскі лётчык, удзельнік Першай сусветнай вайны.

24 красавіка 1914 года пабіў рэкорд вышыні палёту сярод італьянскіх пілотаў, дасягнуўшы вышыні 4700 метраў.

Біяграфія

Нарадзіўся ў Капуі 20 верасня 1879 года, у сям’і Мікеле Саламонэ і Марыі Джузэпы, народжанай Валета. У верасні 1897 года быў прызваны на службу ў каралеўскую армію, дзе яго вызначалі ў 76-ы пяхотны полк Неапаля. Пазней Саламонэ вырашыў застацца ў войсках на пастаяннай аснове. 31 кастрычніка 1902 года паступіў у Каралеўскую ваенную акадэмію Мадэны, якую скончыў у званні другога лейтэнанта. У верасні 1904 года быў прызначаны ў 7-ы пяхотны полк. У студзені 1907 года Саламонэ перавялі ў ахову ваеннага склада ў Гаэце, а ў верасні таго ж года ён быў павышаны да звання лейтэнанта.

З пачаткам італа-турэцкай вайны змагаўся ў Лівіі, дзе трапіў у авіяцыю ў якасці паветранага назіральніка. У жніўні 1912 года атрымаў ліцэнзію пілота для палётаў на манаплане Blériot XI. З сакавіка 1913 года Саламонэ служыў у Табруку, дзе правёў некалькі паспяховых разведвальных палётаў і быў узнагароджаны сярэбраным медалём «За ваенную доблесць». У лістападзе быў накіраваны ў Францыю, каб асвоіць новыя мадэлі самалётаў. 24 красавіка 1914 года Саламонэ пабіў рэкорд вышыні палёту сярод італьянскіх пілотаў, дасягнуўшы вышыні 4700 метраў.

У ліпені 1915 года, з уступленнем Італіі ў Першую сусветную, быў вызначаны ў 8-ю разведвальную эскадрыллю, дзе лятаў на знішчальніку Macchi-Nieuport Ni.10. 1 верасня прыкамандзіраваны да 2-й разведвальна-баявой эскадрыллі.

18 лютага 1916 года Саламонэ прыняў удзел у атацы італьянскай авіяцыі на аўстра-венгерскія ваенныя аб’екты ў Любляне, у адказ на бамбардзіроўку Мілана, здзейсненую паветранымі сіламі праціўніка за некалькі дзён да гэтага. Падчас авіяналёту вялікая частка самалётаў з яго эскадрыллі была знішчана. Самалёт самога Саламонэ атрымаў пашкоджанні.

Пазней ён стаў камандзірам 1-й эскадрыллі, якая пад яго кіраўніцтвам удзельнічала ў бамбардзіроўцы Трыеста. Пасля бітвы пры Капареце Саламонэ павысілі да звання маёра.

Увечары, 2 лютага 1918 года, вяртаючыся з начнога рэйду, з-за дрэннай бачнасці, выкліканай туманам, Саламонэ ўрэзаўся ў будынак. Ён, лейтэнант-назіральнік Марыяна Д’яла-Годай і лётчык-сяржант Антоніа Порта загінулі. Чацвёртаму члену экіпажа, сяржанту Сільвіё П’евезану, удалося выжыць. Цела Саламонэ першапачаткова было пахавана на могілках у Падуі. Пазней астанкі лётчыка ўрачыста перапахавалі на малой радзіме ў Капуі.

Памяць

• У Капуі, Неапалі, Рыме і Мілане ёсць вуліцы, якія носяць яго імя;
• Аэрапорт Капу названы ў яго гонар;
• База ўзброеных сіл, якая знаходзіцца недалёка ад Капуі, таксама носіць імя Саламонэ.

Літаратура

• Domenico Ludovico, Gli aviatori italiani nel bombardamento nella guerra 1915—1918, Roma, Stato Maggiore dell’Aeronautica Militare, 1980.
• Roberto Mandel, La guerra aerea, Milano, Edizioni Aurora, 1934.
• Guido Maisto, AD Astra. Pionieri Napoletani del Volo, Editrice «La Via Azzurra», 1948.
• Mancini L. Grande Enciclopedia Aeronautica : [итал.]. — Milano : Edizioni Aeronautica, 1936. — 660 p.
• Ufficio Storico dell’Aeronautica Militare, Testi delle motivazioni di concessione delle Medaglie d’Oro al Valor Militare, Roma, Stato Maggiore dell’Aeronautica Militare, 1969.

Спасылкі

• Sito ufficiale dell'Aeroporto Oreste Salomone (нявызн.)(недаступная спасылка). www.comunedicapua.it. Архівавана з першакрыніцы 21 кастрычніка 2018. Праверана 21.10.2018. (італ.)