Беньямін Мацвеевіч Басаў

Беньямін Мацвеевіч Басаў
Дата нараджэння	12 кастрычніка 1913(1913-10-12)
Месца нараджэння	Мсціслаў, Мсціслаўскі павет, Магілёўская губерня, Расійская імперыя
Дата смерці	4 снежня 2001(2001-12-04) (88 гадоў)
Грамадзянства	Беларусь
Род дзейнасці	графік, мастак
Месца працы	Беларуская дзяржаўная акадэмія мастацтваў Беларусь
Вучоба	Беларускі дзяржаўны мастацкі тэхнікум (1933) Маскоўскі дзяржаўны акадэмічны мастацкі інстытут імя В. І. Сурыкава[d] (1948)
Уплыў	Аляксандр Аляксандравіч Асьмёркін, Рыгор Міхайлавіч Шэгаль[d] і Ігар Эмануілавіч Грабар

Беньямін Мацвеевіч Басаў (12 кастрычніка 1913 — 4 снежня 2001) — беларускі і расійскі графік і жывапісец.

Біяграфія

Нарадзіўся ў 1913 годзе ў г. Мсціславе Магілёўскай губерні ў сям’і краўца Мацвея Мошавіча Басава і Марыі Рыгораўны (Шыфрыной). Акрамя Беньяміна, у сям’і быў яшчэ малодшы сын (1918) Ізраіль, у будучым — мастак-графік.

Вучыўся ў Маскоўскім дзяржаўным мастацкім інстытуце імя В. І. Сурыкава (1938-48) у С. Б. Герасімава, А. А. Асьмёркіна, Р. М. Шэгаля, дыпломная праца — «У карціннай галерэі».

Удзельнік выставак з 1930-х гадоў. У 1935-38 гадах жыў у Беларусі. Пасля — у Маскве.

Творчасць

Працаваў пераважна ў кніжнай графіцы. Аформіў і ілюстраваў для Белдзяржвыдата, Дзяржлітвыдата і іншых кнігі: «Напярэдадні» (1949, арыгіналы ў ДТГ) і «Рудзін» (1952) І. С. Тургенева, «Чалкаш») (1958) і «Дзяльба» (1963, арыгіналы ў музеі А. М. Горкага, г. Самара) А. М. Горкага, «Сялянскія дзеці» М. А. Некрасава (1955), «Белыя ночы» Ф. М. Дастаеўскага (1958, арыгіналы ў ДЛМ і Ніжагародскім мастацкім музеі), «Апавяданні» А. П. Чэхава (1956, арыгіналы ў ДТГ), «Лёс чалавека» М. А. Шолахава (1961-62) і іншыя.

Напісаў карціны: «Выезд на працу» (1950, Екацярынбургскі музей выяўленчых мастацтваў), «Канцэрт-справаздача» (1954), «9 студзеня» (тэмпера, 1955, Музей палітычнай гісторыі Расіі, «За кнігай» (1956), «Саўгас „Парэчча“» (1959, Дзяржаўны музей мастацтваў Казахстана імя А. Касцеева, «Паўднёвы захад. Восень» (1962), «Транспарт» (серыя, тэмпера, 1964) і іншыя.

Выстаўкі

Прымаў удзел у Першай выстаўцы мастацкага афармлення кнігі ў БССР у 1934 годзе ў Мінску.

Працы Б. Басава экспанаваліся на Міжнароднай выстаўцы кнігі ў Лейпцыгу ў 1959 годзе. Выстаўка яго твораў адбылася ў 1961 годзе ў Маскве.

Спадчына

Творы мастака знаходзяцца ў зборах Дзяржаўнай Траццякоўскай галерэі (г. Масква, Расія), Дзяржаўнага Рускага музея (г. Санкт-Пецярбург, Расія), Дзяржаўнага музея гісторыі выяўленчых мастацтваў імя А. С. Пушкіна (г. Масква, Расія), Нацыянальнага мастацкага музея Рэспублікі Беларусь (г. Мінск, Беларусь) і ў прыватных калекцыях.

Спасылкі

• БАСОВ БЕНИАМИН МОИСЕЕВИЧ (БАСОВ ВЕНИАМИН МАТВЕЕВИЧ) (руск.)
• Бениамин Басов (1913—2001) Архівавана 19 мая 2020. (руск.)