Вольга Уладзіміраўна Бабкова

Вольга Уладзіміраўна Бабкова
Дата нараджэння	27 лютага 1961(1961-02-27) (64 гады)
Месца нараджэння	Мінск, Беларуская ССР, СССР
Род дзейнасці	гісторык, пісьменніца, архівістка
Месца працы	Гісторыка-культурны музей-запаведнік «Заслаўе» Нацыянальны гістарычны архіў Беларусі Еўрапейскі гуманітарны ўніверсітэт Нацыянальны акадэмічны тэатр імя Янкі Купалы
Альма-матар	гістарычны факультэт БДУ (1984)
Член у	Беларускі ПЭН
Прэміі	прэмія імя Францішка Багушэвіча (2010)

Вольга Уладзіміраўна Бабкова, па нараджэнні Голубева (нар. 27 лютага 1961, Мінск) — беларуская гісторык, архівістка, пісьменніца. Лаўрэатка Літаратурнай прэміі імя Францішка Багушэвіча (2010).

Біяграфія

Нарадзілася ў сям’і інжынера Уладзіміра Сцяпанавіча Голубева (1933—2010, родам з украінскіх Шчорсаў) і філолага Ірыны Паўлаўны Леановіч (1931, родам з Ваўкавыска). Скончыла сярэднюю школу № 80 у Мінску. У 1983 годзе скончыла гістарычны факультэт Беларускага дзяржаўнага ўніверсітэта імя У. І. Леніна.

З 1982 года працуе ў Цэнтральным дзяржаўным гістарычным архіве БССР (цяпер Нацыянальны гістарычны архіў Беларусі). Займала пасады архіварыус, архівіста, малодшага навуковага супрацоўніка аддзелаў інфармацыі, публікацыі і навуковага выкарыстання дакументаў і інфармацыйна-пошукавых сістэм. Займалася ўлікам і камплектаваннем бібліятэкі архіва.

Некаторы час працавала навуковым супрацоўнікам у Заслаўскім запаведніку. З 1991 года вярнулася ў НГАБ, працавала ў аддзеле старажытных актаў вядучым навуковым супрацоўнікам, палеографам. З 2003 года — загадчыца аддзела старажытных актаў.

У 2008—2010 гадах выкладала ў Еўрапейскім гуманітарным універсітэце. У 2013—2020 гадах сумяшчала працу ў НГАБ з загадваннем літаратурна-драматургічнай часткай Нацыянальнага акадэмічнага тэатра імя Янкі Купалы.

Член Беларускага ПЭН-цэнтра.

Навуковая і літаратурная дзейнасць

Займаецца распрацоўкай актавых кніг XVI—XVII стагоддзяў (Менскі гродскі суд, Слонімскія гродскі і земскі суды). Даследуе гісторыю Менска XVI—XVII стагоддзяў, гісторыю штодзённасці насельніцтва Беларусі на падставе вывучэння актавых матэрыялаў.

Прымала ўдзел у складанні даведніка «Фонды Нацыянальнага гістарычнага архіва Беларусі» (2006). З’яўляецца адным з аўтараў-складальнікаў навуковага зборніка «Тэстаменты другой паловы XVI ст. па матэрыялах актавых кніг НГАБ» (2012).

Аўтар шэрагу публікацый па гісторыі Беларусі XVI—XVII стагоддзяў, а таксама артыкулаў пра вядомых дзеячаў культуры Беларусі: Васіля Цяпінскага, Соф'ю Слуцкую, Паўлюка Багрыма, Міхаіла Мялешку. Аўтар цыкла гістарычных эсэ, надрукаваных у газеце «Наша Ніва» («Стары Менск», «Дзеці», «Чарадзейства», «Грошы», «Старажытныя імёны», «Вяселле», «Дарога», «Шляхецкія скарбы» і іншыя). Выйшла кніга эсэ з гісторыі штодзённасці Вялікага Княства Літоўскага «…І цуды, і страхі» (2010).

Бібліяграфія

• Новыя дадзеныя аб В. Цяпінскім на падставе актавага матэрыялу ЦДГА БССР у Мінску // Наш радавод. Кн. 3. Ч. 1. Гродна, 1991. С. 194‑198.
• Васіль Цяпінскі: Новыя дакументы // Спадчына. 1991. № 3. С. 15‑19.
• Паўлюк Багрым: Фрагменты да біяграфіі // Культура. 1993. 25 студзеня.
• Вяртанне (публ. дзённіка Міхаіла Мялешкі) // Шляхам гадоў: Гісторыка-літаратурны зборнік. Мн., 1994. С. 131‑140.
• Тры дакументы пра Зафею Слуцкую // Архіварыус: Зб. навук. паведамл. і арт. Вып. 2. Мн., 2004. С. 83‑92.
• Новы факт да біяграфіі Паўлюка Багрыма // Архіварыус: Зб. навук. паведамл. і арт. Вып. 2. Мн.: НГАБ, 2004. С. 92‑93.
• Тэстаменты з актавых кніг Менскага гродскага суда XVI–XVII cтст. // Архіварыус: Зб. навук. паведамл. і арт. Вып. 3. Мн., 2005. С. 104–119.
• Карчма // Найясьнейшая Рэч Паспалітая. Мн.: Кнігарня НН, 2007. — С. 40–44.

Літаратура

• А. Ф. Аляксандрава. Бабкова Вольга Уладзіміраўна // Нацыянальны гістарычны архіў Беларусі — скарбніца дакументальнай спадчыны 1938—2008 / А. К. Галубовіч [і інш.]. — Мінск: НАРБ, 2008. — С. 125. — 270 с. — ISBN 978-985-6372-55-4.
• Архівісты Беларусі: біябібліягр. давед. / Склад. С. У. Жумар, М. Ф. Шумейка. — Мн.: БелНДІДАС, 2006. — С. 60-61. — 254 с. — ISBN 985-6733-12-X.
• Шынкарэнка В. К. Гістарычнае эсэ як вопыт рэканструкцыі мінулага // Известия Гомельского государственного университета имени Ф.Скорины, № 1 (82), 2013. — С. 185—190.