Дзікае (заказнік)

Дзі́кае — гідралагічны заказнік рэспубліканскага значэння на тэрыторыі Пружанскага раёна Брэсцкай і Свіслацкага раёна Гродзенскай абласцей. Створаны ў 1968 годзе з мэтай зберажэння ў натуральным стане асноўнай часткі Дзікага балота, а таксама для падтрымання гідралагічнага рэжыму прылеглай часткі Белавежскай пушчы. Плошча заказніка складае 7,4 тыс. га (1997).

Знаходзіцца ў межах Нарава-Ясельдзінскай раўніны. Займае частку старажытнай праточнай даліны на водападзеле Балтыйскага і Чарнаморскага басейнаў. У флоры заказніка больш за 150 відаў, ёсць рэдкія ахоўныя віды: арніка горная, венерын чаравічак сапраўдны, зубніца клубняносная, лілея-саранка і інш. Тарфяныя паклады сярэдняй глыбінёй 1,4 м пераважна з драўнянага (найчасцей бярозавага) торфу, укрытага асаковым і часткова асакова-гіпнавым. У глыбокіх западзінах сапрапелі (магутнасць пластоў да 0,6 м). На балотным масіве зрэдку трапляюцца мінеральныя «астраўкі» з шыракалістых і шыракаліста-хвойных лясоў.

Літаратура

• Беларуская энцыклапедыя: У 18 т. Т. 6: Дадаізм — Застава / Рэдкал.: Г. П. Пашкоў і інш. — Мн. : БелЭн, 1998. — Т. 6. — 576 с. — 10 000 экз. — ISBN 985-11-0035-8. — ISBN 985-11-0106-0 (т. 6).