Какосавае малако

З пляцоўкі Вікіпедыя
Jump to navigation Jump to search
Какосавае малако ў талерцы.

Какосавае малако — малочна-белая саладкаватая вадкасць, якая выпрацоўваецца з мякаці паспелага какосавага арэха. Выкарыстоўваецца як кампанент для падрыхтоўкі розных страў пераважна ўсходняй кухні. Какосавае малако варта адрозніваць ад «какосавай вады» (какосавага соку) — натуральнай вадкасці, якая знаходзіцца ўнутры какосавага арэха. Утрыманне тлушчаў у какосавым малацэ ў сярэднім складае 27 %, вугляводаў — 6 %, бялку — 4 %. Акрамя гэтага, малако змяшчае вітаміны В1, В2, В3, С.

У адрозненне ад какосавай вады, какосавае малако атрымліваюць штучным шляхам, змешваючы здробненую мякаць какоса і ваду. У Малайзіі, Брунеі і Інданезіі какосавае малако звычайна называюць сантанам, а на Філіпінах — гатай.

Какосавае малако звычайна вар'іруюць па ступені гушчыні (найбольш густое называюць какосавымі сліўкамі). Больш густыя гатункі звычайна выкарыстоўваюць для падрыхтоўкі дэсертаў і тлустых соусаў, менш густыя — у супах (напрыклад, саюр-ладэ), а таксама для другіх страў.