Леанід Міхайлавіч Рабцаў

Леанід Міхайлавіч Рабцаў
Дата нараджэння	1955
Месца нараджэння	Аляксандраўка, Чарнаруцкі сельсавет, Шклоўскі раён, Магілёўская вобласць, Беларуская ССР, СССР
Грамадзянства	Беларусь
Род дзейнасці	суддзя, выкладчык універсітэта
Месца працы	Міністэрства ўнутраных спраў Рэспублікi Беларусь Акадэмія Міністэрства ўнутраных спраў Рэспублікі Беларусь Беларускі дзяржаўны эканамічны ўніверсітэт
Навуковая ступень	доктар юрыдычных навук (2001)
Навуковае званне	прафесар
Альма-матар	юрыдычны факультэт БДУ (1982)
Узнагароды

Леанід Міхайлавіч Рабцаў (нар. 1955, в. Аляксандраўка Шклоўскага раёна Магілёўскай вобласці) — беларускі юрыст, мае вышэйшы кваліфікацыйны клас.

Біяграфія

У 1982 годзе скончыў юрыдычны факультэт Беларускага дзяржаўнага ўніверсітэта.

У 1981 годзе пачаў службу ў органах унутраных спраў і затым займаў розныя пасады начальніцкага саставу ў цэнтральным апараце МУС Рэспублікі Беларусь. Працаваў у Акадэміі МУС Рэспублікі Беларусь, дзе прайшоў шлях ад выкладчыка да першага намесніка начальніка Акадэміі.

У 1990 годзе абараніў кандыдацкую (Акадэмія МУС СССР, г. Масква), а ў 2001 годзе доктарскую (Інстытут дзяржавы і права Нацыянальнай акадэміі навук Беларусі) дысертацыі. Мае вучонае званне прафесара.

З 2003 года выкладаў у Беларускім дзяржаўным эканамічным універсітэце, займаў пасаду загадчыка кафедры тэорыі і гісторыі права, а з сакавіка 2005 года — дэкана факультэта права гэтай ВНУ.

Са снежня 2007 года — суддзя Канстытуцыйнага Суда Рэспублікі Беларусь.

Навуковая дзейнасць

Аўтар больш як 170 навуковых публікацый у галіне адміністрацыйнага, фінансавага і інфармацыйнага права, тэорыі права і кіравання.

Узнагароды

Узнагароджаны медалямі «За бездакорную службу» III і II ступені, медалём «За працоўныя заслугі» (2019 год).

Міжнародныя санкцыі

24 верасня 2020 года Сейм Літвы ўключыў Леаніда Рабцава ў спіс асоб, якім забаронены ўезд на тэрыторыю Літвы. Гэта рашэнне было прынята ў адказ на фальсіфікацыю вынікаў прэзідэнцкіх выбараў 2020 года і рэпрэсіі супраць мірных пратэстоўцаў.