Мокішскае падняцце
Мо́кішскае падня́цце (ад назвы вёскі Мокіш у Хойніцкім раёне) — тэктанічная структура ў Хойніцкім раёне Гомельскай вобласці, ва ўсходняй частцы Ельскага грабена Прыпяцкага прагіну. Выяўлена ў 1972 годзе сейсмаразведачнымі працамі.
Па падсалявых дэвонскіх адкладах Мокішскае падняцце мае форму прыразломнага структурнага носа памерам 9×6 км, які ўскладняе монакліналь і прымыкае на ўсходзе да разлому субмерыдыянальнага распасцірання. Па гэтым разломе структурны нос некалькі апушчаны адносна Астраглядскага і Стралічаўскага блокаў. Мокішскае падняцце абмежавана разломам з поўначы, па якім яно апушчана адносна Людзвінскага і Мікуліцкага блокаў на 1000 м. Па міжсалявых задонска-ялецкіх адкладах размешчана заходняя апушчаная частка структурнага носа, які выходзіць у межы Астраглядскай і Стралічаўскай плошчаў. Па паверхні верхнефаменскай саляноснай тоўшчы намечана невялікая (5×3 км) брахіантыкліналь на паўднёвым крыле структурнага носа. Мокішскае падняцце фарміравалася ў познефранскі і фаменскі час позняга дэвону і каменнавугальны час.
Літаратура[правіць | правіць зыходнік]
- Мокішскае падняцце // Энцыклапедыя прыроды Беларусі. У 5-і т. Т. 3. Катэнарыя — Недайка / Рэдкал. І. П. Шамякін (гал. рэд.) і інш. — Мн.: БелСЭ імя Петруся Броўкі, 1984. — 588 с., іл. — 10 000 экз.