Стралічаўскае падняцце

Стралі́чаўскае падня́цце (ад назвы вёскі Стралічава ў Хойніцкім раёне) — тэктанічная структура ў Брагінскім і Хойніцкім раёнах Гомельскай вобласці, у паўднёва-ўсходняй скляпеністай частцы Хойніцкага пахаванага выступу Прыпяцкага прагіну, на мяжы з Брагінскім выступам. Устаноўлена сейсмаразведкай у 1953 годзе і пацверджана рэкагнасцыровачна-плошчавымі работамі ў 1956 годзе.

Па падсалявых адкладах Стралічаўскае падняцце — невялікі (9×2 км) монаклінальны блок, абмежаваны разломамі з чатырох бакоў і арыентаваны ў субшыротным напрамку; апушчаны адносна Брагінскага выступу і Астраглядскага блоку на 800—1000 м, падняты адносна Мокішскага выступу на 200 м. Сфарміравалася ў франскі і фаменскі час позняга дэвону.

Літаратура

• Стралічаўскае падняцце // Энцыклапедыя прыроды Беларусі. У 5-і т. Т. 5. Стаўраструм — Яшчур / Рэдкал. І. П. Шамякін (гал. рэд.) і інш. — Мн.: БелСЭ імя Петруся Броўкі, 1986. — 583 с., іл. — 10 000 экз.