Падзор (архітэктура)

Падзор пад дахам (Магілёўская вобласць)

Падзор у драўляным дойлідстве — дошка з глухой, скразной або краявой разьбой, якая акаймоўвае навісь даху або страхі ці робіцца пад застрэшкам 2-схільнага даху; элемент дэкору. Выкарыстоўваецца пераважна ў жыллі, некаторых гаспадарчых пабудовах, брамах і варотах, культавых збудаваннях. Найбольш простыя падзоры — дошкі з краявой разьбой у выглядзе зубцоў або хвалі. Ажурная скразная разьба падзораў з выкарыстаннем арнаментальных геаметрычных ці раслінных матываў характэрна для жыллёвага будаўніцтва ўсходняй і паўднёва-ўсходняй Беларусі (жылыя дамы ў Быхаве, Бабруйску, Ветцы, Гомелі і інш.).

Літаратура

• Падзор // Беларуская энцыклапедыя: У 18 т. Т. 11: Мугір — Паліклініка / Рэдкал.: Г. П. Пашкоў і інш. — Мн. : БелЭн, 2000. — Т. 11. — 560 с. — 10 000 экз. — ISBN 985-11-0035-8. — ISBN 985-11-0188-5 (т. 11).
• Сахута Я. М. Народная разьба па дрэву. Мн., 1978.