Песня песням (Скарына)

Песня песням
Гравюра з «Песні песням»
Аўтар	Францыск Скарына
Мова арыгінала	старабеларуская
Дата першай публікацыі	9 студзеня 1518
Колькасць старонак	12 аркушаў

Песня песням, Песня песень («Книга премудраго царя Саломона рекомая Песнь песнямъ») — пражскае выданне Скарыны, якое выйшла ў свет 9 студзеня 1518 года.

Змест кнігі

Выданне адкрываецца тытульным лістом з гравюрай і назвай кнігі («Зуполне выложена на руский языкъ докъторомъ Франъцискомъ Скориною з Полоцька…»). На першым і другім аркушы даецца «Предословие доктора Франъциска Скорины с Полоцька в книгу Песнь песням царя Саломона», у прадмове Скарына тлумачыць назву кнігі і яе змест, у якім ён бачыць апалогію Божай любові. Пасля на аркушах 3 — 11-м даецца тэкст усіх 8 раздзелаў кнігі Песні Песень, а на адвароце 11 аркуша — пасляслоўе. У пасляслоўі змешчана кароткая анатацыя кнігі, а таксама месца і час выдання.

Друкарскія асаблівасці выдання

Кніга выдадзена на царкоўна-славянскай мове беларускай рэдакцыі. Фармат выдання — у чвэрць аркуша, аб'ём — 12 аркушаў, якія сабраны ў адзін сшытак. Набор выкананы пражскім шрыфтам Скарыны — у 10 радкоў вышынёй 75 мм, на паласе — 22 радкі. Сігнатура адсутнічае. Фаліяцыя на верхнім баку аркуша ўверсе злева. Кніга Песня песень — адзінае выданне, якое мае двухфарбавы друк. Чырвоным колерам надрукаваны загалоўкі тытульнага ліста, прадмовы, пачатак асноўнага тэксту, раздзелаў, указанні пра парадак чытання і першая літара пасляслоўя. Выданне ўпрыгожана гравюрай «Хрыстос і нявеста» (тытульны ліст), 2 застаўкамі і 10 ініцыяламі. Перад асноўным тэкстам надрукавана вялікая застаўка з выявай дзікіх людзей і гербавым шчытом з зацьменнем сонца, малая застаўка змешчана перад тэкстам пасляслоўя. Ініцыялы вылучаюць пачаткі раздзелаў.

Захавалася 9 экзэмпляраў кнігі Песні Песень, з іх толькі адзін поўны.

Літаратура

• Францыск Скарына і яго час: Энцыкл. давед./ Беларус. Сав. Энцыклапедыя; Рэдкал. І. П. Шамякін (гал. рэд.) і інш. — Мн.: БелСЭ, 1988. — 608 с.: іл. ISBN 5-85700-003-3