Прынцэса-нявеста (фільм)

Прынцэса-нявеста
англ.: The Princess Bride
Жанр	рамантычная камедыя[d], фэнтэзійны фільм, экранізацыя рамана[d], пірацкі фільм[d] і фільм плашча і шпагі[d]
Рэжысёр	Роб Рэйнер[d]
Прадзюсар	Andrew Scheinman[d]
Сцэнарыст	William Goldman[d]
У галоўных ролях	Cary Elwes[d] Робін Райт Mandy Patinkin[d] André the Giant[d] Крыс Сарандан[d] Christopher Guest[d] Wallace Shawn[d] Fred Savage[d] Пітэр Фальк Billy Crystal[d] Кэрал Кейн Mel Smith[d] Anne Dyson[d] Peter Cook[d] Betsy Brantley[d] Mark Knopfler[d]
Аператар	Adrian Biddle[d]
Кампазітар	Mark Knopfler[d]
Кінакампанія	20th Century Fox
Працягласць	94 хв. і 97 хв.
Бюджэт	16 000 000 $
Зборы	30 857 814 $ і 30 902 442 $
Краіна	ЗША  Аўстралія
Мова	англійская
Год	12 лістапада 1987, 13 кастрычніка 1988 і 25 верасня 1987
IMDb	ID 0093779
Афіцыйны сайт (англ.)
Медыяфайлы на Вікісховішчы

«Прынцэса-нявеста» (англ.: The Princess Bride) — амерыканскі прыгодніцкі фільм 1987 года рэжысёра Роба Райнера. Карціна пастаўлена па матывах аднайменнага рамана Уільяма Голдмана, які і адаптаваў сваю кнігу для вялікага экрана. Галоўныя ролі выканалі Кэры Элвес, Робін Райт, Мэндзі Пацінкін, Крыс Сарандан, Крыстафер Гест, Уолес Шон, Андрэ Гігант.

Прэм’ера фільма адбылася 25 верасня 1987 года ў ЗША. Карціна была добра прынята крытыкамі, але мела сціплы касавы поспех. У 2016 годзе фільм быў унесены ў Нацыянальны рэестр фільмаў, якія лічацца «культурна, гістарычна ці эстэтычна значнымі».

Сюжэт

Да хворага, змушанага заставацца дома хлопчыка (Фрэд Сэвідж) прыходзіць дзядуля (Пітэр Фальк). Ён прыносіць хлопчыку ў падарунак кнігу С. Моргенштэрна «Прынцэса-нявеста», якую адразу ж пачынае чытаць унуку.

У выдуманай краіне Флорын на маленькай ферме жыла цудоўная дзяўчына па імені Пералеска (Робін Райт). Яе любімым заняткам было катацца на кані і даймаць рознымі паручэннямі маладога парабка Уэстлі (Кэры Элвес), які працаваў на ферме. І на ўсе яе загады, нават часам даволі бессэнсоўныя, ён заўсёды адказваў толькі адно: «Як пажадаеце». З часам Пералеска зразумела, што Уэстлі закаханы ў яе і што яна адказвае яму ўзаемнасцю. Каб зарабіць грошай на вяселле, Уэстлі вымушаны пакінуць ферму і шукаць удачы за морам. Неўзабаве Пералеска атрымлівае вестку, што карабель, на якім адплыў Уэстлі, быў захоплены Страшным Піратам Робертсам, які ніколі не пакідае палонных у жывых. Забітая горам Пералеска заяўляе, што больш нікога і ніколі не пакахае.

Мінае пяць гадоў, і Пералеска, якая лічыць Уэстлі мёртвым, згаджаецца заручыцца з прынцам Хампердынкам (Крыс Сарандан), які звярнуў на яе ўвагу. Аднак перад самым вяселлем дзяўчыну выкрадаюць трое бандытаў: сіцылійскі крымінальны геній Візіні (Уолес Шон), іспанскі майстар фехтавання Ініга Мантоя (Мэндзі Пацінкін) і гігант з Грэнландыі па імені Фэззік (Андрэ Гігант). Праз некаторы час яны заўважаюць, што іх пераследуе чалавек у масцы, апрануты ў чорнае. Адначасова ў пагоню за бандытамі выступае і прынц Хампердынк.

Каб пазбавіцца ад чалавека ў чорным, ад банды аддзяляецца Ініга Мантоя. Будучы чалавекам гонару, ён дапамагае пераследніку падняцца да сябе на скальную пляцоўку, а перад паядынкам цікавіцца, ці не шасціпалы яго супернік. Чалавек у чорным паказвае рукі, на кожнай з якіх па пяць пальцаў. Тады Ініга расказвае, што яго бацьку-каваля, забіў чалавек з шасцю пальцамі на правай руцэ. Ён замовіў у майстра шпагу і не пажадаў яму плаціць. Ініга, які быў тады дзіцём, не змог адпомсціць забойцу, а той неўзабаве бясследна знік. Іспанец даў бацьку клятву помсты і дзеля гэтага вывучыўся па-майстэрску валодаць шпагай і дваццаць гадоў запар шукаў шасціпалага. Скончыўшы свой аповед, Ініга б’ецца на шпагах з чалавекам у чорным, але прайграе. Тым не менш пераможца, не жадаючы забіваць такога вялікага майстра, якім сябе паказаў іспанец, проста аглушае яго. Спыніць загадкавага пераследніка спрабуе гігант Фэззік — ён згаджаецца змагацца без зброі, урукапашную, але таксама аказваецца пераможаны спрытным праціўнікам. Той, прытрымліваючыся сваіх ранейшых прынцыпаў, пакідае волата ў жывых. Далей чалавек у чорным наганяе Візіні, які трымае Пералеску ў якасці закладніцы, і прапануе яму інтэлектуальную дуэль. Ён налівае віно ў два келіхі і адзін атручвае — Візіні трэба адгадаць, у які з кубкаў падсыпаны яд. Пасля доўгіх разважанняў Візіні асушае адзін з келіхаў і імгненна памірае, бо атрута была ў абодвух кубках. Чалавек жа ў чорным шмат працаваў над тым, каб выпрацаваць імунітэт да гэтага яду.

Вызваліўшы Пералеску, чалавек у чорным заяўляе ёй, што ён — той самы Страшны Пірат Робертс, які забіў Уэстлі. Падчас размовы Робертс сцвярджае, што памятае, як забіў Уэстлі, і што той быў бы вельмі расчараваны, што яго нявеста аказалася няздольнай на каханне і з карыслівых памкненняў выходзіць замуж за прынца. Пералеска ў лютасці штурхае яго з высокага ўзгорку і крычыць, што жадае яму смерці, але ў адказ чуе: «Як пажадаеце». Пералеска разумее, што перад ёй быў сам Уэстлі, і кідаецца за ім з гары. Пазней Уэстлі расказвае сваю гісторыю. Аказваецца, што сапраўдны Робертс шмат гадоў таму адышоў ад спраў, і яго тытул і імя ўвесь гэты час перадаваліся ад аднаго пірата да іншага. У выніку папярэдні Робертс, які сапраўды захапіў Уэстлі і быў крануты яго гісторыяй, зрабіў яго сваім пераемнікам і правадыром піратаў. Аднак зараз, пасля ўз’яднання з каханай дзяўчынай, Уэстлі хоча кінуць пірацкае рамяство.

Тым часам прынц, з’яўляючыся выдатным следапытам, пераследуе закаханых па пятах. Пералеска і Уэстлі, уцякаючы ад пагоні, хаваюцца ў Вогненных тапінах, дзе Уэстлі некалькі разоў ратуе сваю каханую ад гібелі. Тым не менш Хампердынк усё адно знаходзіць іх. Пералеска вяртаецца да прынца ў абмен на абяцанне, што Уэстлі адпусцяць, аднак Хампердынк, падмануўшы нявесту, аддае палоннага свайму дарадцу графу Тайрану Ругену (Крыстафер Гест), які, даследуючы боль, ставіць вопыты на людзях у таемнай камеры катаванняў — «Яміне адчаю». Патрапіўшы ў палон, Уэстлі бачыць, што на правай руцэ графа шэсць пальцаў.

Пералеска заяўляе Хампердынку, што не выйдзе за яго замуж, таму што кахае Уэстлі. Прынц прапануе здзелку — ён адправіць на пошукі Уэстлі, які з піратамі нібы плавае каля берагоў Флорына, свае самыя хуткія караблі, але калі Уэстлі не з’явіцца, то Пералеска павінна будзе выйсці за Хампердынка. Дзяўчына згаджаецца, але з часам разумее, што прынц ашукаў яе, і кідае яму ў твар абвінавачванне ў баязлівасці. Разгневаны Хампердынк спускаецца ў «Яміну адчаю», і забівае Уэстлі.

Ініга, які не ведае пра смерць Візіні, і чакае яго вяртання, жыве ў Зладзейскім лесе каля каралеўскага замка. Фэззік жа запісаўся ў Брутальны атрад, які загадаў сфарміраваць Хампердынк, каб напярэдадні вяселля ачысціць Зладзейскі лес. Падчас аблавы ў лесе сябры сустракаюцца, і Фэззік расказвае Ініга, што Візіні памёр, а граф Руген — шасціпалы. Ініга разумее, што ўдваёх з гігантам яны не змогуць перамагчы ахову замка, і вырашае прыцягнуць чалавека ў чорным. У іх атрымоўваецца знайсці камеру катаванняў, а ў ёй мёртвага Уэстлі. Сябры адпраўляюцца да старога чараўніка Макса (Білі Крыстал), у надзеі набыць цуд. Той не хоча брацца за справу, але калі даведваецца, што гэта прынясе пакуты прынцу, то згаджаецца прыгатаваць ажыўляючую пілюлю.

Утрох сябры распрацоўваюць план, як пракрасціся ў замак, і паспяхова яго ажыццяўляюць, запалохваючы і разганяючы ахову. Ініга знаходзіць Ругена, і ў працяглым паядынку забівае яго, стрымаўшы дадзеную бацьку клятву. Уэстлі і Пералеска сустракаюцца зноў. Паядынку з прынцам не адбываецца: баязлівы кіраўнік сам кідае шпагу на падлогу. Усе чацвёра разам пакідаюць замак. Пералеска і Уэстлі збіраюцца жыць мірным жыццём, і прапануюць Ініга стаць новым Страшным Піратам Робертсам.

Акцёрскі склад

Абрамленне

Фрэд Сэвідж	–   хлопчык, якому чытаюць казку
Пітэр Фальк	–   дзядуля / расказчык
Бэтсі Брэнтлі	–   маці

Асноўная гісторыя

Кэры Элвес	–   Уэстлі / страшны пірат Робертс / чалавек у чорным
Робін Райт	–   Пералеска / прынцэса-нявеста
Мэндзі Пацінкін	–   Ініга Мантоя
Крыс Сарандан	–   прынц Хампердынк
Крыстафер Гест	–   граф Тайран Руген
Уолес Шон	–   Візіні
Андрэ Гігант	–   Фэззік
Пітэр Кук	–   выразны святар
Мэл Сміт	–   Альбінос
Кэрал Кейн	–   Валеры, жонка Макса
Білі Крыстал	–   чараўнік Макс
Марджэры Мейсан	–   старая, што фукае
Малкальм Сторы	–   Елін
Уілабі Грэй	–   кароль

Саўндтрэк

Музычнае суправаджэнне да фільма напісаў Марк Нопфлер. Выключэннем з’яўляецца песня «Storybook Love», кампазітар і выканаўца якой — Вілі Дэвіль.

№	Назва	Працягласць
1.	«Once upon a Time… Storybook Love»	4:00
2.	«I Will Never Love Again»	3:04
3.	«Florin Dance»	1:32
4.	«Morning Ride»	1:36
5.	«The Friends' Song»	3:02
6.	«The Cliffs of Insanity»	3:18
7.	«The Swordfight»	2:43
8.	«Guide My Sword»	5:11
9.	«The Fire Swamp and the Rodents of Unusual Size»	4:47
10.	«Revenge»	3:51
11.	«A Happy Ending»	1:52
12.	«Storybook Love»	4:24

Узнагароды

Паводле рэсурса «Internet Movie Database» фільм быў адзначаны 7 кінаўзнагародамі і яшчэ 10 намінацыямі.

Спасылкі

• Прынцэса-нявеста на сайце «Internet Movie Database» (англ.)