Свята-Мікалаеўская царква (Кажан-Гарадок)

Праваслаўная царква
Свята-Мікалаеўская царква
Царква летам 2020
52°12′18,40″ пн. ш. 27°00′34,61″ у. д.
Краіна	Беларусь
Вёска	Кажан-Гарадок
Канфесія	Руская праваслаўная царква
Епархія	Пінская і Лунінецкая
Архітэктурны стыль	Усходнепалеская школа дойлідства
Будаўніцтва	1818
Статус	Гісторыка-культурная каштоўнасць Беларусі, шыфр 112Г000458
Стан	Дзейнічае
Сайт	kazhan-haradok.cerkov.ru
Медыяфайлы на Вікісховішчы

Свята-Мікалаеўская царква — праваслаўная царква ў аграгарадку Кажан-Гарадок Лунінецкага раёна, Брэсцкай вобласці.

Архітэктура

Драўляная царква вылучаецца вытанчанасцю прапорцый, пластычнасцю малюнка. Храм пірамідальна-цэнтрычнай кампазіцыі, складаецца з пяці зрубаў, пастаўленых па крыжы, і з званіцай над уваходам. Будынак падкрэслены сярэднім зрубам, які вылучаецца сваім аб'ёмам, вышынёй і памерамі. Чатыры невялікія вежкі з купаламі на астатніх зрубах групуюцца сіметрычна вакол сярэдняга. Ствараецца пяцікупалле, якое стварае ў прасторы пірамідальную кампазіцыю. Вонкавая архітэктура традыцыйна простая з мінімальным выкарыстаннем дэкаратыўных сродкаў. Гонтавы шацёр і вальмавыя дахі бабінца і апсіды завершаны цыбулепадобнымі галоўкамі на глухіх гранёных шыйках. Вертыкальна ашаляваныя сцены апярэзаны аркатурным фрызам і зубчастым карнізам, расчлянёны прамавугольнымі аконнымі праёмамі ў простых ліштвах. Уваход арганізаваны праз нізкі прытвор пад пакатым двухсхільным дахам.

Інтэр’ер

У адрозненне ад іншых храмаў, Кажан-гарадоцкая царква ўнутры багата аздоблена. Унутры зала храма перакрыта пірамідальным скляпеннем на ветразях. Бабінец падзелены на два ярусы, на верхнім з якіх размешчаны хоры, раскрытыя ў залу фігурнай аркай. Інтэр’ер багата аздоблены паліхромнай драўлянай скульптурай і разьбой. Абразы: «Звеставанне» (XVIII ст.), «Нараджэнне Хрыстова» (мяжа XVIII—XIX ст.), «Маці Божая з дзіцем», «Святыя Кузьма, Аляксей і Дзям’ян» (абодва XIX ст.)

Званіца

Адасоблена пастаўлена на планіровачнай восі царквы званіца. Уяўляе сабой двух'яруснае цэнтрыч- нае збудаванне. Ніжні чатырохгранны ярус зрубны, другі — адкрыты каркасны пад шатровым гонтавым пакрыццём. Ярусы падзелены развітым гонтавым адлівам-карнізам.

Літаратура

• Архітэктура Беларусі: Энцыклапедычны даведнік. — Мн.: БелЭн, 1993. — 620 с. — ISBN 5-85700-078-5.
• Збор помнікаў гісторыі і культуры Беларусі / АН БССР. Ін-т мастацтвазнаўства, этнаграфіі і фальклору; Рэд. кал.: С. В. Марцэлеў (гал. рэд.) і інш. — Мн.: БелСЭ, [1984—1988].
• Беларуская энцыклапедыя: У 18 т. Т. 7: Застаўка — Кантата / Рэдкал.: Г. П. Пашкоў і інш. — Мн. : БелЭн, 1998. — Т. 7. — 604 с. — 10 000 экз. — ISBN 985-11-0035-8. — ISBN 985-11-0130-3 (т. 7).
• Праваслаўныя храмы Беларусі : энцыклапедычны даведнік / А. М. Кулагін; маст.: З. Э. Герасімовіч, У. П. Свентахоўскі. — Мінск: Беларуская Энцыклапедыя, 2007. — 653 с. — 2 000 экз. — ISBN 978-985-11-0389-4.
• Кажан-Гарадоцкая Мікалаеўская царква // Беларусь: энцыклапедычны даведнік / Рэдкал. Б. І. Сачанка (гал. рэд.) і інш.; Маст. М. В. Драко, А. М. Хількевіч. — Мн.: БелЭн, 1995. — С. 353. — 800 с. — 5 000 экз. — ISBN 985-11-0026-9.

Спасылкі

• Свята-Мікалаеўская царква (Кажан-Гарадок) на сайце Глобус Беларусі (руск.)
• Свята-Мікалаеўская царква (Кажан-Гарадок) на сайце Radzima.org
• Свята-Мікалаеўская царква (Кажан-Гарадок) на сайце «Архіварта»