Шпакі (гурт)

Шпакі
Шпакі
Жанры	поп-музыка і рок-музыка
Краіны	БССР;
Адкуль	Мінск
Мовы песень	руская і беларуская

«Шпакі́» — беларускі вакальна-інструментальны ансамбль.^[1]

Гісторыя

Утварыўся ў 1969 годзе, дзякуючы намаганням трубача Міхала Гальдштэйна. Перад тым ён граў разам з Уладзімірам Мулявіным у філарманічным ансамблі «АрБіта-67». Струнную частку «Шпакоў» сфармавалі студэнты фізфаку БДУ — Аляксандар Сцепаненка (гітара), Эдуард Ваданосаў (бас) і Вячаслаў Чыжэўскі (сола-гітара). Трывалы касцяк «Шпакоў» сфарміраваўся з прыходам арганіста і вакаліста Аляксандра Гаўрыловіча. Праз гурт прайшло мноства вакалістаў — ад Валянціна Буркаценкі да будучай удзельніцы «Верасоў» Галіны Пучковай і Аляксандра Саладухі.

Першыя некалькі гадоў «Шпакі» базіраваліся ў Палацы культуры Камвольнага камбіната, дзе рэгулярна гралі на танцах. На той час у ПК мелася добрая апаратура. У 1972 годзе гурт перабраўся ў ПК Трактарнага завода. Гурт Міхала Гальдштэйна заняў прамежкавы, кампрамісны стан паміж афіцыйнай эстрадай і рок-падмосцем. «Шпакі» абслугоўвалі грамадскія мерапрыемствы, звязаныя з МТЗ, партканферэнцыі ды камсамольскія з’езды, удзельнічалі ў конкурсах і фестывалях «палітычнай песні». На танцавальных вечарынах «Шпакам» дазвалялася выконваць, што хацелі яны самі: «The Beatles», «The Rolling Stones», «Chicago^[en]», «ABBA» і Дону Самэр^[en]. Сапраўднай легендай у сталічнай рок-тусоўцы стала гісторыя з набыццём «Шпакамі» камплекта нямецкай апаратуры «Dynacord^[de]».

Гурт неаднаразова запрашаўся беларускім тэлебачаннем. Музыкі удзельнічалі ў здымках пад каляднай ялінай і зборным канцэрце ў мінскім Палацы спорту. У 1977 годзе «Шпакі» апынуліся на Усесаюзным тэлебачанні ў Маскве. Іх запрасілі на тэлепраграму «Шире круг^[ru]». Там узніклі праблемы з беларускамоўным назовам ансамбля і знешнім выглядам музыкантаў.

У рэпертуары «Шпакоў» мелася шмат беларускіх песень, у тым ліку ўласнай вытворчасці. Міхал Гальдштэйн напісаў музыку да песні «Курганы», некалькі твораў прапанаваў Эдуард Ваданосаў. Песня «Дзе ж ты, зорка мая» на музыку Ігара Лучанка і словы Адама Русака выдала фірма «Мелодия^[ru]». У студыю Беларускага радыё гурт пусцілі толькі ноччу пасля асабістага ціску Лучанка, таму што аматарскія гурты ўвогуле не маглі рабіць запісы на радыё. «Зорка» ўвайшла ў песенны зборнік кампазітара, выдадзены на вінілавай кружэлцы ў 1974 годзе з каментарам Генадзя Бураўкіна на вокладцы. Рарытэтная плытка цяпер захоўваецца ў Нацыянальнай бібліятэцы Беларусі.

У 1980 годзе гурт спыніў дзейнасць, бо яго лідар Міхал Гальдштэйн эміграваў у ЗША.

Склад

Міхал Гальдштэйн — вакал, труба
Аляксадр Соркін — вакал
Галіна Пучкова — вакал
Аляксандр Гаўрыловіч — арган, вакал
Вячаслаў Чыжэўскі — гітара
Віктар Навумаў — гітара
Эдуард Ваданосаў — бас-гітара
Аляксандр Малажавы — бубны

Узнагароды і фестывалі

прадстаўлялі Мінск на аўтарытэтным джазавым фестывалі «Бурштынавая труба» ў Коўне (1970)
удзельнічалі ва Усесаюзным фестывалі савецкай моладзі (1972—1973)
выступалі ў Ленінградзе ў межах конкурсу «Алло, мы ищем таланты!^[ru]» (1973)
абаранялі гонар Трактарнага завода на выставе ў ВДНХ СССР (1974)
бралі ўдзел у канцэрце-мітынгу ў гонар XI Усясветнага фестывалю моладзі і студэнтаў у Гаване (1978)

Зноскі

↑ Сямашка, Віктар. !OUT: «Шпакі» прыляцелі!* (Фота, аўдыё) (нявызн.)(недаступная спасылка). Тузін Гітоў (22 лютага 2014). Архівавана з першакрыніцы 16 чэрвеня 2021. Праверана 15 чэрвеня 2021.

Спасылкі

На Вікісховішчы пакуль няма медыяфайлаў па тэме, але Вы можаце загрузіць іх

[1] Сямашка, Віктар. !OUT: «Шпакі» прыляцелі!* (Фота, аўдыё) (нявызн.)(недаступная спасылка). Тузін Гітоў (22 лютага 2014). Архівавана з першакрыніцы 16 чэрвеня 2021. Праверана 15 чэрвеня 2021.

[1]