Аляксандр Мікалаевіч Казлоўскі

Аляксандр Мікалаевіч Казлоўскі
Аляксандр Мікалаевіч Казлоўскі
Дата нараджэння	1832
Месца нараджэння	Мсціслаўскі павет, Магілёўская губерня, Расійская імперыя;
Дата смерці	1890
Грамадзянства	Расійская імперыя;
Род дзейнасці	інжынер
Месца працы	Беларуская дзяржаўная сельскагаспадарчая акадэмія;
Альма-матар	Мінская мужчынская гімназія; Горы-Горацкі земляробчы інстытут (1852);

Аляксандр Мікалаевіч Казлоўскі (1832, Мсціслаўскі павет — 1890) — беларускі вучоны ў галіне меліярацыі сельскагаспадарчых зямель, прафесар (1860).

Біяграфія[правіць | правіць зыходнік]

Нарадзіўся ў сям’і збяднелага шляхціца рымска-каталіцкага веравызнання. У 1848 годзе пасля заканчэння Мінскай гімназіі паступіў у Горы-Горацкі земляробчы інстытут, які ў 1852 годзе закончыў са званнем агранома ў чыне дзесятага класа (калежскі рэгістратар).

У 1853 годзе камандзіраваны Дэпартаментам сельскай гаспадаркі ў Германію i Бельгію, а ў 1858 годзе — у Англію для вывучэння досведу выкарыстання дрэнажу. У 1856—1860 гадах працаваў інжынерам, а з 1860 года — прафесарам механікі і архітэктуры Горы-Горацкага земляробчага інстытута. Дасканала вывучаў вопыт прымянення дрэнажу ў Заходняй Еўропе і Прыбалтыцы. У 1856—1862 гадах прафесарам А. М. Казлоўскім упершыню на тэрыторыі сучаснай Беларусі на вучэбнай ферме Горы-Горацкага інстытута закладзены ганчарны дрэнаж. Дрэніраванне ажыццяўлялася ў мэтах асушэння мінеральных суглінкавых глеб і нізінных тарфянікаў, замкнутых забалочаных лагун, лугоў, а таксама для зніжэння напору грунтавых вод у ніжніх частках адхонаў буйных каналаў, каб прадухіліць іх абрушванне.

Дрэнажныя работы ў Горках з’явіліся першым айчынным доследам асушэння сельскагаспадарчых зямель з прымяненнем ганчарных трубак. Шматлікія даследаванні дрэнажнай сістэмы А. М. Казлоўскага, праведзеныя ў 1850-1860-х гадах вучонымі-меліяратарамі, дазволілі зрабіць вывад аб высокай вартасці ганчарнага дрэнажу — яго даўгавечнасці і надзейнасці пры ўмове добрай эксплуатацыі і доглядзе збудаванняў.

За ўдзел у нацыянальна-вызваленчым паўстанні 1863 г. у Горках высланы на 6 гадоў з Беларусі ў Таўрыйскую губерню, дзе працаваў аграномам-інжынерам гідрамеліярацыі, да 1869 года займаўся абвадненнем зямель.

Зноскі

Літаратура[правіць | правіць зыходнік]

Казлоўскі Аляксандр Мікалаевіч // Энцыклапедыя гісторыі Беларусі. У 6 т. Т. 4: Кадэты — Ляшчэня / Рэдкал.: Г. П. Пашкоў (галоўны рэд.) і інш.; Маст. Э. Э. Жакевіч. — Мн. : БелЭн, 1997. — С. 11. — 10 000 экз. — ISBN 985-11-0041-2.
Казлоўскі Аляксандр Мікалаевіч // Энцыклапедыя прыроды Беларусі. У 5-і т. Т. 2. Гатня — Катынь / Рэдкал. І. П. Шамякін (гал. рэд.) і інш. — Мн.: БелСЭ імя Петруся Броўкі, 1983. — С. 430. — 522 с. — 10 000 экз.
Первые исследования эффективности дренажных систем // Лившиц В. М., Немыкин В. В., Цыганов А. Р. Горы-Горецкий земледельческий институт. Выдающиеся учёные и профессора. — Горки, 1999. — С. 113—116.