Корага
| Корага (ಕೊರಗ) | |
| |
| Агульная колькасць | 17000 |
|---|---|
| Рэгіёны пражывання | Карнатака, Керала |
| Мова | корага |
| Рэлігія | індуізм |
| Блізкія этнічныя групы | тулу |
Ко́рага (саманазва: ಕೊರಗ) — племянная і каставая супольнасць на поўдні Індыі. Насяляе штаты Карнатака і Керала. Агульная колькасць (2019 г.) - 17 000 чалавек[1]
Паходжанне[правіць | правіць зыходнік]
Корага з'яўляюцца абарыгенамі паўднёвай Індыі, інтэграванымі ў індуісцкую супольнасць. Згодна з паданнямі, раней насялялі Заходнія Гаты, але ў XV ст. на чале з правадыром Хубашыка заваявалі частку ўзбярэжжа Карнатакі. Суседзі лічаць корага нашчадкамі ад шлюбу жанчыны-брахмана і мужчыны-шудры.
У XIX ст. корага знаходзіліся ў прыгоннай залежнасці ад храмавых гаспадарак, дзе выконвалі абавязкі земляробаў і прыбіральшчыкаў, удзельнічалі ў рэлігійных святах у якасці барабаншчыкаў.
Асаблівасці культуры[правіць | правіць зыходнік]
У мінулым корага насялялі лясныя раёны. Ізаляванасць населеных імі месцаў прывяла да фарміравання субэтнічных груп з асобнымі назвамі. Іх галоўнымі заняткамі былі збіральніцтва, пляценне кошыкаў, абслугоўванне вясковых свят у якасці барабаншчыкаў і прыбіральшчыкаў, за што яны мелі права на збор рэшткаў ежы і рэчаў. Абарона лясоў ад вырубкі з боку дзяржавы прывяла да перасялення корага ў калоніі на ўскраінах звычайных вёсак і гарадоў. Яны атрымалі невялікія надзелы зямлі для земляробства, якім займаюцца пераважна жанчыны. Мужчыны працуюць наёмнымі рабочымі, плятуць кошыкі. Сярод іх захоўваецца нізкі ўзровень пісьменнасці і ўзроўню жыцця.
Паселішчы корага маюць раскіданую планіроўку. Традыцыйныя хаціны копа ў мінулым будаваліся з бамбуку і падзяляліся на 3 часткі для жытла, гаспадарчых патрэб і асаблівай жаночай прастары для менструацый і народзін дзяцей. Корага не прытрымліваюцца вегетарыянства. Пашырана ўжыванне мяса палай жывёлы і алкагольных напояў.
Для корага характэрны адлік сваяцтва па матчынай лініі. Шлюбы заключаюцца па дамоўленасці. Дзве траціны сем'яў малыя нуклеарныя. Астатнія вялікія пашыраныя. Цкаванне з боку суседзяў прывяло да фарміравання руху корага за свае правы. У Махараштры былі забаронены практыкі прыніжэння корага астатнімі абшчыннікамі.
Корага вядомы як музыканты і спевакі. Вядомы вершы і гістарычныя паданні, запісаныя на мове корага ў першай палове XX ст.
Мова[правіць | правіць зыходнік]
Родная мова корага разам з мовай тулу адносіцца да асобнай паўднёвай галіны дравідыйскіх моў. Падзяляецца на 4 дыялекты, прычым дыялект муду корага ў Керале моцна адрозніваецца ад дыялектаў Карнатакі[2]. Пісьмовасць на аснове знакаў канада.
Рэлігія[правіць | правіць зыходнік]
Асноўная рэлігія — індуізм, які ўвабраў у сябе традыцыйныя племянныя вераванні ў багоў і духаў. Вышэйшай істотай для шанавання лічыцца бог Корага Танія. У корага ёсць асобныя месцы для рэлігійных рытуалаў, у тым ліку знутры жытла. Астатнія індуісты вылучаюць іх у асобную касту з нізкім статусам. З-за веры ў асаблівыя магічныя здольнасці корага ў мінулым іх не пускалі ўнутр індуісцкіх храмаў, хаця часам пыталі блаславіць дзяцей ці выкарыстаць сваю магічную сілу інакш на карысць людзям. Корага таксама прымалі ўдзел у рэлігійных святах у якасці барабаншчыкаў. У нашы дні абмежаванні ў рэлігійнай практыцы разглядаюцца як дыскрымінацыя, аднак пакуль сустракаюцца ў пабытовым жыцці.
Зноскі
Спасылкі[правіць | правіць зыходнік]
- Adivasis and the Indian State: Karnataka's Koraga tribe battles centuries-old discriminatory practice; official inaction adds to woes
- Koraga community has been a victim of globalisation
- Nalinam M., Depopulation of Koraga Tribes in South India
- Socio-Economic Status among Koraga Tribe of Udupi District
- Shodhganga